لو الفيزا اتسرقت أو ضاعت.. 3 خطوات تنقذ حسابك البنكي وتحمي فلوسك

تخيل تفتح محفظتك وتكتشف إن الفيزا ضاعت أو اتسرقت! في اللحظة دي كل دقيقة بتفرق.. وعلشان تحمي فلوسك لازم تعمل 3 خطوات بسرعة.

أول خطوة.. اقفل الكارت فورًا من تطبيق البنك على الموبايل أو اتصل بخدمة العملاء واطلب إيقاف البطاقة فورًا.

ثاني خطوة.. راجع آخر العمليات اللي تمت على الحساب.. شوف إذا كان فيه سحب أو مشتريات حصلت من غير علمك، ولو لقيت أي حركة مشبوهة بلغ البنك فورًا.

ثالث خطوة.. اطلب إصدار بطاقة جديدة.. البنك هيلغي البطاقة القديمة نهائيًا ويطلعلك كارت جديد برقم وبيانات مختلفة علشان محدش يقدر يستخدم الكارت المفقود.

وفيه أخطاء لازم تتجنبها: متأخرش في الإبلاغ عن السرقة أو الفقدان.  متشاركش الرقم السري مع أي حد.  متحتفظش بالرقم السري مكتوب في المحفظة. 
متردش على أي مكالمة مجهولة تطلب بيانات بطاقتك.

ونصيحة مهمة.... فعل رسائل البنك على موبايلك، لأنها بتخليك تعرف أي حركة على حسابك أول بأول.

لو الفيزا ضاعت.. السرعة هي أهم سلاح لحماية فلوسك، كل ما تتحرك أسرع، كل ما تقل فرص تعرض حسابك لأي خسائر.