طلبك اترفض.. اعرف إزاي تعمل تظلم وتستخرج كارت الخدمات المتكاملة

لو قدمت على كارت الخدمات المتكاملة وطلبك اترفض.. فده مش معناه إن الفرصة انتهت! وزارة التضامن أتاحت أكتر من طريقة تقدر بيها تقدم تظلم وتطلب إعادة الكشف الطبي من جديد.

أول طريقة إلكترونيًا: بتدخل على موقع وزارة التضامن، وتسجل بياناتك، وبعدها تختار "تظلمات بطاقة الخدمات المتكاملة".. هتملأ النموذج المطلوب، وترفع المستندات زي: بطاقة الرقم القومي
والتقرير الطبي الحديث
وأي أوراق تدعم حالتك.
وبعدها تقدر تتابع حالة التظلم أونلاين.

أما لو عاوز تقدم ورقي: تروح الوحدة الاجتماعية أو الإدارة التابعة لمنطقتك، وتطلب نموذج التظلم، وتملاه وتسلمه مع الأوراق المطلوبة، وتاخد إيصال استلام.

ومن أهم المستندات المطلوبة: بطاقة الرقم القومي سارية، وتقرير طبي حديث يوضح نوع ودرجة الإعاقة.

والبطاقة دي بتدي مميزات مهمة جدًا، زي: دخول مجاني للمناطق الأثرية والمتاحف والكشف المجاني بالمستشفيات والتعيين ضمن نسبة الـ5% وكمان الإعفاء الجمركي على الأجهزة التعويضية.

ولو البطاقة ضاعت منك؟ تقدر تبلغ فورًا على الخط الساخن 15044 الخاص بوزارة التضامن. يعني لو طلبك اترفض.. لسه قدامك فرصة تقدم تظلم وتعيد الكشف من جديد.