مش هتعرف تصرف تموينك.. حالة واحده توقفلك بطاقتك نهائيا

لو بطاقتك التموينية وقفت فجأة وانت واقف عند البدال ومش عارف تصرف التموين فمتقلقش الموضوع ممكن يكون بسبب غلطة بسيطة جدًا انت مش واخد بالك منها.

وزارة التموين أعلنت إن فيه أسباب ممكن تؤدي لإيقاف البطاقة أو وقف الدعم بالكامل.. زي إن يكون فيه شخص متوفي ولسه اسمه موجود على البطاقة، أو حد مسافر بره مصر بقاله فترة طويلة ولسه مضاف، أو حتى إن البطاقة متستخدمتش أكتر من 6 شهور متواصلة
وكمان لو فيه بيانات غلط أو أشخاص مضافين من غير صلة قرابة حقيقية.. ساعتها البطاقة ممكن تتوقف لحد ما يتم تحديث البيانات.

عشان كده الوزارة طالبت كل المواطنين بسرعة تحديث بيانات التموين إلكترونيًا عن طريق منصة مصر الرقمية، وده لتجنب وقف صرف السلع أو حذف البطاقة من المنظومة.

ولو هتحدث بياناتك لازم تجهز شوية أوراق مهمة زي بطاقة الرقم القومي للزوج والزوجة، إيصال كهرباء حديث، وثيقة الزواج، شهادات ميلاد الأبناء أو بطايقهم، وكمان بيانات أي شخص مقيد على البطاقة.

والوزارة شددت إن كل البيانات لازم تكون مطابقة للمستندات الرسمية لأن أي معلومة غلط ممكن تعرض البطاقة للإيقاف.