سر الصفقة القطرية الجديدة.. العقار كلمة السر في هزيمة الدولار
مليارات وصفقة من الوزن التقيل.. ياترى ايه حكاية الاستثمارات القطرية اللي جاية وازاي القطاع العقاري كان كلمة السر في القضاء على سطوة الدولار.. وازاي المشروعات الجاية هتسقط الدولار للابد.
لو بصينا للأرقام هنلاقي إن القطاع العقاري المصري هو القطاع الاقتصادي الأكبر اللي كان سبب في وقف جنون الدولار وانتهاء الأزمة الصعبة فق العملة الصعبة.. لو هتقول ازاي.. هقول لحضرتك ان القطاع العقاري هو اللي جاب صفقة رأس الحكمة وهو اللي جذب أكبر صفقة استثمارية في تاريخ مصر بتكلفة إجمالية 150 مليار دولار... مش بس كده وكمان القطاع العقاري لسه هو الحصان الأسود في ملف الاستثمار وجذب المليارات خاصة في قطاع الإسكان الفاخر والفندقي ومشروعات الترفيه.
طيب ايه الجديد في ملف العقارات والاستثمار ؟
بعد صفقة رأس الحكمة في الساحل الشمالي طرحت مصر اكتر من منطقة تانية في مناطق مميزة جدا على سواحل البحر الأحمر والمتوسط وشواطئ سيناء ودا عشان تكرر مشروعات الصفقات التقيلة في القطاع الحيوي دا وحاليا فيه شركات وهيئات وصناديق مالية خليجية بتدرس اكتر من مشروع ضخم على غرار رأس الحكمة في المتوسط.
المهندس طارق شكري رئيس غرفة التطوير العقاري ووكيل لجنة الإسكان كشف مفاجأة جديدة لما قال إن صفقة رأس الحكمة كانت مجرد بداية لصفقات مشابهة هتتنفذ في مصر في الفترة الجاية وإن مشروع رأس الحكمة فتح شهية دول تانية وشركات من أوروبا كمان عشان تلحق تحجز مكانها في السوق المصري الواعد وخاصة في قطاع الترفيه والسياحة ومشروعات الفنادق والقرى السياحية والمنتجعات مع الطفرة السياحية اللي بتحصل في مصر..
رئيس غرفة التطوير العقاري كشف بعض المعلومات المتاحة حولين صفقة قطرية محتملة على غرار رأس الحكمة وقال إن المعلومات المتاحة عن الصفقة القطرية بتقول إن فيه صفقتين أولها في الساحل الشمالي وهيكون مشروع مشابه لرأس الحكمة والصفقة التانية هتكون في العاصمة الإدارية الجديدة أو في ساحل البحر الأحمر ورجحت المعلومات أنها هتكون في سواحل البحر الاحمر وتوقع المسؤول قرب تنفيذ صفقة استثمارية كبرى مع قطر وهي الأقرب للتنفيذ وكشف كمان عن صفقات سعودية وكويتية كبيرة بيتم التحضير ليها في الوقت الحالي وهيتم الإعلان عليها قريب جدا وبردوا هتكون في القطاع العقاري.
وفي العموم القطاع العقاري قدر يكون وعاء استثماري واعد في المنطقة والشرق الأوسط وأنه هيعزز من قدرة السوق المصري على تصدير العقار ويكون مورد رئيسي من موارد الدولار للخزانة المصرية وشفنا ازاي محافظ البنك المركزي أكد في لقاء جمعه بالوفد السعودي من ايام على توفر الدولار للمستثمرين بشكل فوري ودون أي انتظار وتأكيده على انتهاء أزمة الدولار وأنها اتحلت بالقطاع العقاري وكان يقصد صفقة رأس الحكمة الإماراتية.
اذا كانت صفقة رأس الحكمة وقفت جنون الدولار فأكيد الصفقة القطرية الجاية ومعناها المشروعات السعودية والكويتية الجديدة هتكون الضربة الاقوي للدولار في الفترة الجاية مع زيادة المعروض النقدي من العملات الصعبة وشفنا إزاي الرئيس السيسي قدر يجذب استثمارات خليجية لمصر بحوالي 29 مليار دولار في جولته الأخيرة ودا معناه ضعف مستمر في قوة الدولار ودعم كبير الجنيه المصري وقدرته الشرائية.
