السيسي يستعرض عضلات مصر الاستثمارية.. مليارات قطر في الطريق
ليه الرئيس السيسي قعد بنفسه مع مجتمع رجال الأعمال القطريين وايه الفرص الاستثمارية المتاحة قدام أصحاب الشركات ورجال الأعمال القطريين في مصر.
الرئيس السيسي أنهى زيارة مهمة جدا لدولة قطر ردت على كل الاشاعات والتحريض لضرب اسفين مع الدولة الخليجية ومصر على مدار الفترات الأخيرة وأثبت إن العلاقات بين الدول مش بتمشي حسب الاشاعات والتحريض.
طبعا زيارة زي دي كان الملف الاقتصادي حاضر فيها بقوة ودا ظهر من حرص رجال الأعمال وأصحاب الشركات القطرية على لقاء الرئيس السيسي والاستماع منه شخصيا عن الفرص المتاحة والواعدة في السوق المصري والرئيس اتكلم بصراحة معاهم وقال إن مصر فيها فرص ذهبية للاستثمار مع كم المزايا اللي بتقدمها الدولة المصرية للمستثمرين والامكانيات الكبيرة اللي تشجع اي مستثمر زي البنية التحتية القوية والحديثة في كل المجالات سواء طرق ومحاور ومواني ولوجستيات وطاقة وتسهيلات وايد عاملة مدربة ورخيصة وانخفاض قيمة العملة المحلية اللي هتضاعف مكاسب المستثمرين بجانب عامل الاستقرار والأمن في مصر وقربها من كل الأسواق العالمية المهمة.
الرئيس السيسي قال لرجال الأعمال القطريين أن مصر فيها فرص في كل القطاعات خاصة الصناعات والزراعة وصناعة السيارات وتكنولوجيا المعلومات وفي السياحة والترفيه والخدمات والصحة وغيرها من القطاعات الاقتصادية اللي ممكن المستثمرين القطريين يضخوا فلوسهم فيها وبدأت البشاير خلال لقاء المستثمرين القطريين واللي أظهروا حماسة للرئيس السيسي على الاستثمار في السوق المصري وزيادة الاستثمارات الحالية خاصة مع تشجيع القيادة السياسية في قطر والحكومة القطرية على زيادة التعاون مع مصر فى الشأن الاقتصادي الفترة الجاية ودا معناه إننا هنشوف استثمارات ضخمة في الفترة الجاية من الجانب القطري.
ولو رجعنا للارقام هنلاقي إن قطر مستثمر مهم في السوق المصري ومتوقع يوصل حجم استثماراتها في مصر لحوالي 7 مليار دولار بحلول 2026 في قطاعات الاقتصاد المصري المختلفة مع تركيز أكبر على مشروعات الطاقة المتجددة والتكنولوجيا، مما يعزز الشراكة الاقتصادية بين البلدين ويفتح آفاقا جديدة للنمو والتعاون في ظل الصدمات العالمية المتتالية والتوترات الجيوسياسية بالمنطقة العربية.
وفيه حوالي 261 شركة قطرية بنسبة مساهمة قطرية تصل إلى مليارين و165 مليون دولار تعمل في السوق المصرية منها 249 مليون دولار في قطاع السياحة وحوالي 208 ملايين دولار في قطاع الإنشاءات وحوالي 36 مليون دولار في القطاع الصناعي.. ودي أرقام رسمية ومتوقع تزيد بشكل كبير بعد زيارة الرئيس السيسي الأخيرة.
