الزراعة.. ملايين الأفدنة الجديدة وذراع مصر الغذائي
هو ايه اللي بيحصل في قطاع الزراعة في مصر وإزاي الرئيس السيسي قدر يضيف ملايين الأفدنة الجديدة للرقعة الزراعية وياترى مصر صرفت كام على المشروعات دي.
اللي حصل في قطاع الزراعة في مصر في العشر سنين الأخيرة نقدر نقول عليه انجاز غير مسبوق في تاريخ مصر من أيام الفراعنة لغاية دلوقتي وكفاية نعرف إنه في ظرف 10 سنين بس السيسي أضاف 4.5 مليون فدان للرقعة الزارعية مع قرب انتهاء المشروعات الحالية في الدلتا الجديدة وتوشكي وشرق العوينات.
ولأول مرة القطاع الزراعي يكون هدف للمستثمرين المصريين والأجانب بالشكل الكبير دا وتضخ مليارات الدولارات في الزراعة والتصنيع الزراعي والتصدير والأهم من كل دا إن السيسي قدر يصنع لمصر ذراع زراعي قوي يأمن بيه قوت المصريين وشفنا في ذروة الازمات في الاسعار مفيش نوع فاكهة أو خضروات أو حبوب ومحاصيل اختفت من الأسواق وبالعكس أي واحد ماشي في الشارع هيشوف شوادر المنتجات الزراعية في كل مكان من كل شكل ولون يعني السيسي باختصار حفظ لمصر امنها الغذائي ودا شي مهم جدا في منطقة كلها صراعات.
بالأرقام قطاع الزراعة بيعتبر من أكبر القطاعات اللي بتوفر فرص عمل في مصر والاحصائيات بتقول إن 25% من القوى العاملة في البلد شغالة في الأنشطة الزراعية المختلفة وطبعا الانتاج الوفير بيمكن الدولة من التصدير وتوفير العملة الصعبة وفي سنة 2024 مصر صدرت 8.6 مليون طن وبحوالي 5 مليار دولار ولسه القطاع واعد وفيه فرص ضخمة للاستثمار وزيادة المساحة المزروعة وكمان مصر استعانت بأحدث اساليب في العالم للزراعة ودا زود الانتاج.
كمان نمو وتطور القطاع الزراعي انعكس على الانتاج الحيواني والداجني والأمن الغذائي للمصريين على المدى الحالي والبعيد.
ونرجع للأرقام.. هنلاقي إن الدولة صرفت حوالي 50 مليار جنيه في استصلاح الأراضي الجديدة خلال الفترة من 2014-2023 ومستهدف زيادة الإنتاج الزراعي بالأسعار الجارية ليصل إلي 2.43 تريليون جنيه بنهاية 2024 مقابل 1.82 تريليون جنيه خلال سنة 23/2024 بمعدل نمو 20% عن العام السابق ليه.
التطور الكبير في الانتاج الزراعي نيجة إضافة ملايين الأفدنة ساعد مصر في بناء مدن ضخمة لصناعة الغذاء وعودة مصر سلة غذاء العالم وشفنا حجم الصناعات في القطاع الزراعي والغذائي وإن مدينة زي السادات بمحافظة المنوفية هتتحول لسلة غذاء عالمية والبداية كانت بانشاء مدينة سايلو فودزواللي افتتحها الرئيس السيسي على مرحلتين الأولى كانت في أغسطس 2021 والتانية في فبراير 2023.
وبعدها إنشاء مدينة قها وإدفينا للصناعات الغذائية وكمان مشروع مافي لصناعات الأغذية الزراعية بمنطقة المطورين بمدينة السادات باستثمارات 180 مليون دولار لتصنيع الحاصلات الزراعية بأحدث التكنولوجيات في مجال صناعة الأغذية الزراعية.
