التاريخ مفاجأة.. شوف سر اختيار يوم 3 يوليو لافتتاح المتحف المصري الكبير
الحكومة اختارت ميعاد افتتاح المتحف المصري الكبير يوم 3 يوليو.. ياتري ليه الحكومة اختارت المعياد ده بالذات.. والحكومة مستهدفة توصل لكام سائح من افتتاح المتحف.
الحكومة وبشكل رسمي حددت يوم 3 يوليو معياد نهائي لافتتاح المتحف المصري الكبير بشكل رسمي، والتاريخ ده تم اختياره لانه هو اليوم اللي الجيش استجاب فيه لرغبة المواطنين المتظاهرين في الشوارع والميادين للمطالبة بإنقاذ البلاد من حكم المعزول محمد مرسي وجماعته، وخرج المشير عبد الفتاح السيسي في الوقت ده ببيان تاريخي وكان بمثابة أمل جديد للمصريين.
الحكومة في الوقت الحالي بتستعد بكل اجهزتها علشان يوم الإفتتاح وفي استعدادات كبيرة جدا بتحصل في المنطقة خصوصا أن حفل الإفتتاح هيشهد حضور عدد كبير من ملوك ورؤساء ورؤساء حكومات ومشاهير عدد كبير من دول العالم، والحفل مش هيكون علي مدار يوم واحد ولكنه هيتمد لأكثر من 3 أو 4 أيام، وهيكون كل يوم مخصص لفئة معينة من الحضور.
الدولة اختارت معياد افتتاح المتحف المصري الكبير في شهور الصيف وده بهدف تحفيز وتشجيع التوافد السياحي علي مصر من كل الأسواق العالمية، خصوصا أن حركة السياحة الوافدة لمصر من الخارج بتكون قليلة شوية في شهور الصيف مقارنة بشهور فصل الشتاء، وبالتالي الدولة عملت اداه تحفيزية جديدة لتشجيع السائحين من كل دول العالم علي اختيار زيارة مصر.
الحكومة علي مدار الشهور اللي فاتت عملت اختبارات شديدة لقاعات الزيارة اللي مفتوحة للزيارة واللي بتشمل الساحة الخارجية للمتحف والبهو الرئيسي والدرج العظيم ومنطقة البازارات والمطاعم، و 12 قاعة مفتوحة للزيارة، والتجربة اثبتت نجاح خطط الزيارة، وأن القاعات قادرة علي استقبال اي اعداد من الزائرين علي مدار اليوم.
الحكومة بتتوقع أن عدد الزائرين الوافدين للمتحف هيوصلوا لـ15 الف زائر يوميا مع بداية التشغيل وده رقم كويس جدا للزيارة، وعلشان الدولة تعدي الرقم ده بتجهيز حاليا افتتاح الحكومة وصفته بانه هيكون افتتاح اسطوري وهيكون اضخم من الإفتتاح اللي حصل لطريق المومياوات الملكية وطريق الكباش، خصوصا أن النوع ده من الإفتتاحات بيكون عبارة عن دعاية ترويجية لمصر بطريقة غير مباشرة، وبيكون له دور كبير في زيارة التوافد السياحي علي مصر من الخارج.
