رعب يجتاح أسواق العالم.. قرار غامض لترامب وقع البورصات العالمية
يا ترى ليه ترامب قرر فرض رسوم جمركية 25% على كل العربيات وقطع الغيار اللي بتيجي من برا أمريكا ؟ وايه تأثير القرار ده على الأسواق العالمية ؟ وهل أسعار العربيات فى مصر وعالميا ممكن ترتفع ولا لأ؟
الرئيس الأمريكي دونالد ترامب قرر فرض رسوم 25% على كل العربيات وقطع الغيار اللي بتيجي من برا أمريكا .. يعني إما تصنعوا عندنا .. وإما هتدفعوا التمن غالي .. ترامب شايف إن ده الحل السحري عشان يرجع الصناعة الأمريكية لأيامها الذهبية .. ويقولك كمان إن الرسوم دي هتجيب 100 مليار دولار إيرادات جديدة.
بس السؤال .. مين اللي هيدفع الفاتورة دي فعلاً؟
أول حاجة حصلت بعد الإعلان .. الأسواق المالية اتجننت .. في وول ستريت .. أسهم جنرال موتورز نزلت 8% .. فورد وستلانتس خسروا حوالي 4.5% .. حتى تسلا .. اللي بتصنع في أمريكا .. أسهمها هبطت 1.3% لأنها بتعتمد على قطع غيار مستوردة .. في آسيا الوضع كان أسوأ .. تويوتا وهوندا وهيونداي أسهمهم نزلت حوالي 3% في بورصات طوكيو وسيول .. يعني الضربة جات على الكل .. محدش نجا.
طب ليه القرار ده ممكن يشعل حرب تجارية عالمية؟
عشان ببساطة كل دولة هترد .. مش هتسكت .. الصين قالت على طول .. مفيش حد بيطلع كسبان من حرب جمركية .. والاتحاد الأوروبي قال إن الرسوم دي هتضر الأعمال والمستهلكين في أمريكا وأوروبا مع بعض .. اليابان قالت إن تداعيات القرار هتبقى خطيرة على الاقتصاد العالمي .. وكندا وصفتها بهجوم مباشر .. يعني كل دولة بتحضر لرد فعل .. واللي هيحصل إن الدول دي هتفرض رسوم مضادة على المنتجات الأمريكية .. وهتبدأ الدورة .. حرب تجارية ملهاش نهاية.
ومين الدول اللي هتتضرر؟
فيه دول كتير أولهم اليابان .. العربيات بتمثل حوالي 28% من صادراتها لأمريكا .. يعني حوالي 40 مليار دولار في السنة .. و10% من شغالهم في صناعة العربيات .. لو الرسوم دي استمرت .. الاقتصاد الياباني هيتعرض لضربة قوية .. كندا كمان في المركز التاني .. قطاع العربيات عندهم بيشغل حوالي 125 ألف واحد بشكل مباشر .. و500 ألف في شغل مرتبط .. رئيس وزراهم قال إنه هيحمي عمالهم بأي تمن .. يعني جهزوا لرسوم مضادة .. الاتحاد الأوروبي مش هيسكت .. فرنسا قالت إن الخطوة دي سيئة جدًا .. وكوريا الجنوبية بتفكر في إجراءات طارئة .. حتى البرازيل قالت إنها مش هتقف مكتوفة الأيدي.
و إزاي ده هيأثر على أسعار العربيات؟
تخيل معايا .. العربية اللي كنت بتشتريها بـ50 ألف دولار .. بكرة ممكن تبقى 60 ألف أو أكتر .. ليه؟ .. عشان الرسوم الجمركية هتزود تكلفة الاستيراد .. والشركات مش هتستحمل الخسارة دي لوحدها .. هترميها على المستهلك .. جمعية شركات العربيات الأمريكية قالت إن الرسوم دي لازم تتطبق بطريقة متضرش المستهلك .. بس ده حلم بعيد .. الخبراء بيقولوا إن أسعار العربيات ممكن ترتفع آلاف الدولارات في أمريكا .. وفي مصر كمان هتحس بالضربة .. لأن العربيات المستوردة هتبقى أغلى .. والسوق هيتأثر
ترامب بيقول إن الهدف إنه يشجع الشركات تبني مصانع في أمريكا .. وفعلاً شركة زي هيونداي قالت إنها هتبني مصنع جديد هناك .. بس المشكلة إن البناء ده بياخد وقت .. وفي الفترة دي .. المستهلك هو اللي هيدفع التمن .. والشركات هتعاني من تعطل سلاسل التوريد .. يعني بدل ما نشوف ازدهار .. ممكن نشوف فوضى اقتصادية!"
الصورة لسه مش واضحة .. الرسوم هتبدأ فعلاً يوم 3 أبريل 2025 .. وترامب بيقول إنه هيعلن عن رسوم متبادلة يوم 2 أبريل .. يسميه يوم التحرير .. بس السؤال .. تحرير مين؟ .. الدول بتحضر لردود فعل قوية .. والمستهلك في كل حتة هيحس بالنار .. ياترى هيحصل إيه لو الحرب التجارية دي كبرت؟ .. وهتقدر تستحمل أسعار العربيات الجديدة ولا هتبص للسوق المستعمل؟ .. احنا قدام لعبة كبيرة .. والكل بيراقب الخطوة الجاية.
