سر تراجع الدولار أمام الجنيه.. التدفقات كلمة السر
ليه الجنيه صامد وبيزيد قدام الدولار في الفترة الاخيرة رغم الازمات العالمية ولللي في المنطقة عندنا وإيه المفاجأت اللي في الطريق وبتقول إن الجنيه المصري بيتعافي بسرعة.
في الايام الاخيرة اللي بيتابع سوق الصرف هيعرف إن الجنيه بيزيد قدام الدولار ولما مابيرفعش بيستقر ودي ظاهرة مهمة جدا وبتدل على مؤشرات مهمة جدا أولها إن برنامج الاصلاح الاقتصادي ماشي بنجاح كبير وتاني حاجة إن معدلات النمو والنهوض الاقتصادي والمالي بتزيد وفي اتجاه صعودي على كافة المستويات وخاصة على مستوى الاستثمارات الجديدة والكبري اللي بيتم الاعلان عنها كل يوم ومع زيادة وتيرة التصنيع المحلي وتقليل الاستيراد.
كمان فيه سبب تاني مهم وأساسي في صحوة الجنيه المصري أمام الدولار وبقية العملات وهي زيادة التدفقات الدولارية من قطاعات الدولة المختلفة ودا معناه زيادة في المعروض النقدي الأجنبي ودا بيزيد من قوة الجنيه وشفنا معدلات الزيادة في الموارد الدولارية ازاي وصلت لأرقام قياسية سواء في السياحة أو التحويلات الخارجية أو الاستثمارات المباشرة وغير المباشرة والتصدير وقناة السويس رغم أزمتها الاخيرة ودا غير موارد تانية للدولار الدولة بتنميها زي برنامج الطروحات الحكومية وتصدير العقار وبيعه بالدولار ومبادلة الديون بالعملة الوطنية وغيرها من الاجراءات اللي الحكومة نجحت فيها لتلجيم الدولار والسيطرة عليه.
من مؤشرات النجاح الاقتصادي وتعافي الجنيه كمان هو زيادة الاحتياطي النقدي لمصر بشكل غير مسبوق واللي وصل لـ47 مليار دولار وهيوصل 50 مليار دولار في نهاية السنة الحالية حسب التوقعات وكمان نجاح مصر في سداد الديون والانتظام فيها وبخصوص ملف الديون الحكومة أعلنت عن مفاجأة سارة وهي اقرار برنامج وخطة لخفض الديون بواقع مليار ونص و2 مليار سنويا ودا معناه إدارة افضل للملف دا وتخفيف الضغط على الجنيه على المدى المتوسط والبعيد.
كمان مؤشرات المستقبل القريب بتقول أرقام مهمة جدا وهي إن الشهور والسنين الجاية مصر هتكون مشيت بشكل كبير جدا في ملف توطين الصناعة وتقليل الاستيراد ودا هيوفر مليارات الدولارات من الناحيتين وكمان ملف الاستثمار متوقع تحصل فيه قفزة ضخمة في الايام والشهور الجاية ودا اللي بتقوله الاتفاقيات الأخيرة للاستثمار في قطاعات مختلفة وبمبالغ كبيرة سواء في الصناعة أو السياحة أو الزراعة والاستثمار الطبي.
الخلاصة والحقيقة الأكيدة إن الايام الجاية هي ايام الاقتصاد المصري وأيام الجنيه وكل الأرقام والتوقعات بتقول إن مصر بتنهض بشكل كبير جدا ولولا الظروف الخارجية والمحيطة بينا كان زمان مصر في حتة تانية وكانت معدلات النمو أكبر من كده بكتير ولأن الازمات دي في طريقها للزوال فكل المستقبل لمصر والجنيه ودا اللي قالته بردو كبرى المؤسسات الدولية وبدون مجاملة.
