أسعار البنزين والسولار رايحة على فين؟.. والدولة بتدفع دعم كام للوقود؟
يا ترى ايه اللى هيحصل فى ملف دعم الوقود الفترة الجاية؟ واسعار البنزين والسولار ممكن توصل كام تحديدا لو الدولة رفعت ايدها وحررت السعار بالكامل؟ وايه علاقة اللى بيحصل فى الملف ده بصندوق النقد الدولي؟
الحكومة المصرية بقيادة الدكتور مصطفى مدبولي أكدت إنها ناوية تخلّص ملف دعم الوقود نهائيًا بنهاية السنة دي.. وده معناه ان البنزين والسولار والبوتاجاز اللي بنشتريهم بأسعار مدعومة حاليا هتبدأ تتحرك تدريجيا لحد ما توصل للتكلفة الحقيقية بتاعتها.
طب التكلفة الحقيقية دي إيه؟ وهل الموضوع هيحصل مرة واحدة ولا على مراحل؟
بص يا سيدي.. الأسعار الحالية للوقود أقل بكتير من التكلفة اللي بتدفعها الدولة فعليًا.. على سبيل المثال بنزين 80 دلوقتي بـ13.75 جنيه للتر، لكن تكلفته الحقيقية 16 جنيه، يعني ممكن يزيد حوالي 2.25 جنيه، بنسبة 16.5%.. وبنزين 92 بـ15.25 جنيه لكن تكلفته 18 جنيه يعني زيادة حوالي 2.75 جنيه بنسبة 18%..و بنزين 95 اللي بـ17 جنيه تكلفته 19 جنيه يعني زيادة 2 جنيه، بنسبة 12%.
طب والسولار؟
ده بقى الأهم .. لأنه بيأثر على النقل والسلع.. السولار دلوقتي بـ13.5 جنيه، لكن تكلفته 20 جنيه، يعني ممكن يزيد 6.5 جنيه، بنسبة 48% وأنبوبة البوتاجاز اللي بـ150 جنيه، تكلفتها الحقيقية 325 جنيه، يعني زيادة 175 جنيه بنسبة 117%.
بس قبل ما تقلق، خليني أطمنك.. الزيادات دي مش هتطبّق مرة واحدة.. لأن الحكومة عارفة إن ده ممكن يعمل صدمة كبيرة للمواطنين.. الخطة إن الزيادة تتم على مراحل من دلوقتي لحد نهاية 2025.. يعني لجنة تسعير المواد البترولية، اللي بتتقابل كل 3 شهور، هتوزّع الزيادات دي على 3 اجتماعات جاية. يعني كل مرة هيزيدوا جزء صغير من الفجوة بين السعر الحالي والتكلفة الحقيقية، عشان المواطن يقدر يستحمل التغيير ده. وفي نفس الوقت، رئيس الوزراء قال إن فيه منتجات زي البوتاجاز مش هيوصلوها للتكلفة الكاملة، يعني هيفضل فيه دعم جزئي عليها عشان تخفيف العبء.
طب الدعم ده كله بيكلف الدولة كام؟
الدولة بتصرف مليارات الجنيهات كل سنة عشان تحتفظ بالأسعار دي.. في السنة المالية 2024-2025، الموازنة رصدت حوالي 154 مليار جنيه لدعم المواد البترولية.. يعني لو حسبنا السولار لوحده بيكلف حوالي 450 مليون جنيه في اليوم.. ولو ضفنا البنزين والبوتاجاز المبلغ بيوصل لمليار جنيه يوميًا تقريبًا.. عشان كده الحكومة عايزة تقلل العبء ده.. وده جزء من خطتها مع صندوق النقد الدولي عشان تريّح الموازنة وتوجه الفلوس لحاجات زي الصحة والتعليم ولو بصينا لورا شوية في 2020 لما أسعار النفط العالمية كانت في الحضيض بسبب كورونا.. الوقود في مصر كان وصل لنقطة التعادل، يعني السعر اللي بنشتري بيه كان نفس تكلفته.. وقتها المفروض الأسعار تنزل حسب آلية التسعير التلقائي لكن الحكومة ثبتت الأسعار وكمان زوّدت 30 قرش على كل لتر بنزين وسولار.. دلوقتي الوضع مختلف الأسعار العالمية مش ثابتة والحكومة عايزة تخلّص من الدعم ده نهائيًا.. عشان كده الزيادات دي جاية لا محالة.
طب لو الأسعار زادت بالشكل ده.. إيه اللي هيحصل؟
السولار لو وصل 20 جنيه.. تعريفة الأتوبيس والميكروباص والنقل هيزيد.. وبالتالي كل حاجة هتغلى.. من الخضار للرز للزيت.. البنزين لو زاد اللي عنده عربية هيحس بالفرق في جيبه على طول.
