استثمار محدش واخد باله منه.. سر الصعود القياسي لأسعار الفضة
يا ترى إيه اللي بيحصل في سوق الفضة، وليه أسعار المعدن الرمادي ارتفع للسما، هل ده حصل بفعل التأثر بارتفاع أسعار الدهب ولا بهبوط أسعار الفايدة ولا ايه بالظبط، وليه المستثمرين اتحولوا دلوقتي على الفضة.
في الحقيقة، أسعار الفضة ارتفعت في الأسواق المحلية بنسبة 2.4 % خلال تعاملات الأسبوع اللي فات، في حين إن الأوقية ارتفعت هي كمام بالبورصة العالمية بنسبة 3.8 %.
ونقدر نقول إن من أسباب ارتفاع أسعار الفضة، هي زيادة التوقعات بخفض أسعار الفايدة من قِبل البنك الفيدرالي الأمريكي، وكمان ارتفاع أسعار الدهب، في حين إن تقلبات سوق الأسهم حدت من المكاسب.
وفي الأسواق المحلية، فأسعار الفضة ارتفعت بقيمة جنيه واحد، وافتتح سعر جرام الفضة عيار 800 تعاملات الأسبوع عند 42 جنيه، واختتمت التعاملات عند 43 جنيه، في حين ارتفعت الأوقية بالبورصة العالمية، بقيمة 1.24 دولار، وافتتحت تعاملات الأسبوع عند 32.52 دولار، واختتمت عند 33.76 دولار.
وسعر جرام الفضة عيار 999 سجل 54 جنيه، كمان سجل سعر جرام الفضة عيار 925 حوالي 50 جنيه، في حين سجل الجنيه الفضة ( عيار 925) فوصل مستوى 400 جنيه.
والكلام ده بيؤكد إن الفضة وصلت لأعلى مستوى لها من أواخر شهر أكتوبر اللي فات، ودي مدعومة بتراجع بيانات التضخم، وتوقعات الاحتياطي الفيدرالي، وارتفاع أسعار الدهب، ومع كده، أدى انتعاش أسواق الأسهم في أواخر الأسبوع لتقلص مكاسب الفضة والدهب.
وكان ارتفاع سعر الفضة الأسبوع اللي فات مدفوع بشكل كبير بتوقعات خفض أسعار الفايدة من قِبَل الفيدرالي الأمريكي وارتفاع أسعار الدهب، عشان كده استفادت الفضة من كل ده وأدت دورها المزدوج كأصل نقدي وصناعي.
ومع ظهور علامات اعتدال في مستوى التضخم، زادت الأسواق من رهاناتهم على أن الفيدرالي الأمريكي هيتجه لخفض أسعار الفايدة مع نهاية السنة دي، كمان السياسة النقدية اللي هتكون أكثر مرونة، هتقلل من تكلفة الفرصة البديلة للاحتفاظ بالأصول غير المُدرة للعائد زي الفضة، وده في حد ذاته هيعزز من الاستمرار في ارتفاع أسعارها.
كمان، أسواق الفضة بتترقب تداعيات التوترات التجارية العالمية وتحولات سياسة الفيدرالي الأمريكي، واتجاهات التضخم عشان تحدد تحركات الأسعار خلال الفترة الجاية.
ضيف على كل ده، إن اجتماع الاحتياطي الفيدرالي الأسبوع الجاي هيكون حافز رئيسي للفضة، خاصة وان المستثمرون بيبحثوا دلوقتي عن مؤشرات عن توقيت ووتيرة تعديلات أسعار الفايدة خلال الفترة الجاية.
