مصر هتسترد 7 مليار دولار.. إيه اللي بيحصل في قناة السويس
ايه اللي بيحصل في الملاحة بقناة السويس.. وهل القناة استردت قوتها من تاني .. وايه الجديد هناك .. وياترى الحكومة هتسترد مليارات الدولارات اللي ضاعت بسبب الأزمات..
طبعا كلنا عارفين اللي حصل في قناة السويس بعد الأحداث اللي في المنطقة وازاي تأثرت حركة الملاحة بشكل كبير بسبب تصرفات الحوثي في اليمن ووصلت الخسائر حسب رئاسة الجمهورية المصرية أكتر من 60% من عائدات القناة مقارنة بعام 2023 يعني بالارقام مصر خسرت 7 مليار دولار سنة 2024 والرقم الضخم دا مصر خسرته في ذروة أزمة مالية كبيرة لكن الدولة قدرت تعبر منها بسلام لكن المبلغ كان هيفرق كتير طبعا لو موجود وخاصة إن قناه السويس من أهم مصادر الدخل الأجنبي لمصر ومورد أساسي للدولار..
ايه الجديد في قناة السويس ؟
بعد جهود مصر في إقرار الهدنة في المنطقة وتوقف الحرب بالشرق الأوسط وصمود وقف إطلاق النار لفترة كبيرة بدأت السفن ترجع لقناه السويس وتسترد قوتها وايراداتها بالتدريج ودا اللي اعلنه رئيس هيئة قناة السويس، أسامة ربيع واللي كشف إن 47 سفينة عدلت مسار رحلاتها للعبور من قناة السويس بدل من طريق رأس الرجاء الصالح منذ بداية شهر فبراير الجاري يعني بنتكلم في عدد كبير من السفن في شهر واحد ودي مجرد بداية هتشجع سفن تانية كتير وخطوط ملاحية تانية للعودة لقناه السويس.
ربيع أضاف خلال المؤتمر الدولي للنقل البحري واللوجستيات "مارلوج" إن عودة السفن جت بعد مباحثات مشتركة مع الخطوط الملاحية واستشعار العديد من العملاء وجود مؤشرات إيجابية لعودة الاستقرار إلى منطقة البحر الأحمر... ومش كده وبس دا كمان توقع عودة المزيد من الخطوط الملاحية للعبور من قناة السويس مع استمرار حالة الاستقرار في المنطقة.
الفريق أسامة ربيع قال إن أزمة البحر الأحمر فرضت تحديات أمنية غير مسبوقة بالمنطقة ودا انعكس بالسلب على استقرار واستدامة سلاسل الإمداد العالمية بما يتطلب العمل المشترك لاحتواء التبعات السلبية وضمان استمرارية الخدمات البحرية بالمنطقة... وإن قناة السويس بتعمل على تقليل تأثيرات الأزمة على عملائها ودا من خلال التواصل المستمر والمباشر مع الخطوط الملاحية واستقرار السياسات التسعيرية، بخلا استحداث حزمة الخدمات البحرية واللوجيستية لتلبية متطلبات العملاء في الظروف الاعتيادية والطارئة وأبرزها خدمة صيانة وإصلاح السفن، والإنقاذ البحري، ومكافحة التلوث، والإسعاف البحري، وتبديل الأطقم البحرية، والتزود بالوقود.
يعني ببساطة قناة السويس موقفتش محلك سر لكن استغلت الأزمة في التطوير وتقديم خدمات جديدة لوجستية ورب ضارة نافعة لأن هيئة قناة السويس بقت تقدم خدمات جديدة بإيرادات جديدة بعيدة عن رسوم العبور العادية للسفن وكمان الهيئة استغلت الأزمة في الانتهاء من تنفيذ مشروع تطوير القطاع الجنوبي لقناة السويس بشقيه وتشغيله أمام حركة التجارة العالمية وزيادة عامل الأمان الملاحي، وزيادة الطاقة الاستيعابية للقناة بمعدل من 6 إلى 8 سفن.. يعني القناة بقت كلها رايح جاي ودا هيزيد طبعا من معدل العبور في القناة وحركة السفن هتزيد اكتر من الاول بكتير ودا بعد إثبات أن قناة السويس ملهاش بديل في العالم.
