هتكون حتة من باريس وهتدخل 60 مليار جنيه.. ايه اللي بيحصل في المقطم
هو إيه اللي بيحصل في المقطم وازاي المنطقة هتتحول لكنز عقاري وفندقي وسياحي وهتكون حتة من أوروبا.. تعالوا نشوف الحكومة بتعمل ايه هناك وايه حكاية الاستثمارات السعودية في المنطقة.
في الأيام الأخيرة المملكة العربية السعودية أعلنت عن استثمارات جديدة وصخمة في السوق المصري لتوثيق العلاقات الاقتصادية بين البلدين وفي نفس الاستفادة من عوامل الجذب في السوق المصري واللي اتحول لنقطة جذب للاستثمارات الدولية والعربية من ساعة تحرير سعر الصرف في مارس اللي فات وكمان بسبب البنية الأساسية الحديثة وتعديل تشريعات الاستثمار وقرب مصر من الأسواق العالمية وخطوط التجارة وموقعها الجغرافي المتميز اللي خلت مصر حلم لاي مستثمر بيدور على الاستقرار والمكسب.
طيب ايه اللي بيحصل في منطقة المقطم دلوقتي ؟
شوف حضرتك منطقة المقطم بتتمتع بميزات كتيرة جدا ترشحها تكون منطقة على غرار المدن الأوروبية من حيث المقومات السياحية والموقع الجغرافي لأنها اولا بتقع فوق هضبة عالية يعني كاشفة القاهرة كلها وتاني حاجة عشان بتطل على الله الاهرامات والقاهرة القديمة بكل الجمال اللي فيها ودلوقتي الحكومة المصرية شغالة على مشروع لتطوير المنطقة هيقلب الموازين وهيضيف إضافة عظيمة للثروة العقارية المصرية والقطاع السياحي على وجه الخصوص وبيهدف مشروع التطوير لتحقيق إيرادات سنوية لا تقل 60 مليار جنيه كل سنة ودا غير العائد بالدولار من المشروعات السياحية اللي بتتعمل هناك دلوقتي.
وحسب المعلومات يمتد المشروع على مساحة 2 مليون متر مربع في موقع استراتيجي يطل على أهرامات الجيزة وقلعة صلاح الدين ويضم قطعتين القطعة الأولى بشمل كورنيش المقطم والمصاطب بمساحة 1.3 مليون متر مربع، وبتضم أنشطة سكنية وتجارية وسياحية وتعليمية ورياضية وأما القطعة التانية واللي بتقع في الهضبة الوسطى، بمساحة 750 ألف متر مربع، وبتضم كمبوند سكني متكامل الخدمات.
الجديد بقي إن شركة سكوب السعودية و بالشراكة مع شركة النصر المصرية هي اللي شغالة على تنفيذ مشروع كورنيش المقطم وباستثمارات 2.5 مليار دولار، ليصبح واجهة عالمية لمدينة القاهرة لانه بيوفر زي ما قلنا إطلالة استثنائية تمتد إلى أهرامات الجيزة وجميع معالم المدينة على أن يتم تقاسم الإيرادات بين الطرفين بنسبة 70% لشركة سكوب و30% لشركة النصر.
و الشركة السعودية أعلنت من ساعات إنه هيتم إنشاء فندقين أعلى قمة الجبل؛ الأول فندق 5 نجوم بسعة 250 غرفة، باستثمارات 130 مليون دولار، وتديره إحدى أبرز العلامات الفندقية العالمية، والثاني فندق 4 نجوم بسعة 150 غرفة، باستثمارات 60 مليون دولار وبتتجاوز إيرادات المشروع 60 مليار جنيه مصري، مما يعزز من العوائد الاقتصادية للموازنة العامة.
وفعليا بدأت شركة النصر العمل في المشروع بعد الحصول على كافة الموافقات وكمان المشروع بيهدف إلى تحقيق الاستفادة القصوى من الأصول المملوكة لشركات قطاع الأعمال العام وتعظيم العوائد المحققة وكمان المشروع هيساهم في تطوير منطقة المقطم، مما يعزز من جاذبيتها ويزيد من قيمتها العقارية ومن المتوقع أن يوفر المشروع العديد من فرص العمل خلال مراحل الإنشاء والتشغيل ودعم الاقتصاد المحلي.
