الدولار ولا الجنيه.. مين هيكسب في الأيام الجاية
ياترى الجنيه المصري رايح على فين في الايام والشهور الجاية ومين هيكسب الرهان وإزاي العملة المصرية هتكون بطل المشهد.
زي ما احنا متابعين من مارس اللي فات من ساعة قرار التعويم وتحرير سعر الصرف وفق أليات العرض والطلب وسعر الدولار طلع ونزل لكن استقر في دايرة الخمسين جنيه من 49 و51 تحديدا ومطلعش عن المستوى دا وفي نفس الوقت دي شهادة نجاح كبيرة للحكومة والبنك المركزي المصري وكل الهيئات الاقتصادية مقارنة بالظروف الاقتصادية الصعبة اللي كانت البلد بتمر بيها ولولا الاجراءات السريعة كان زمان سعر الدولار ضرب أعلى من كده بكتير جدا.
طيب التوقعات بتقول إيه عن سعر الجنيه في الفترة الباقية من 2025؟
عشان نكون صرحاء مع حضراتكم مفيش حد أو جهة تقدر تقولك الدولار في مارس أو يوليو اللي جايين هيكون كام لأن سعر العملة اللي بيحدده السوق بس والعرض والطلب وحجم المعروض النقدي من الدولار في السوق المصرفي والبنوك لكن فيه معادلة اقتصادية ومالية ممكن تقولك الدولار هيتراوح بين رقم ورقم للأسباب دي وهنشرحها ببساطة كل ما التدفقات المالية زادت وزاد معاها معروض الدولار سعر الدولار هيستقر وممكن ينزل عن حاجز الخمسين جنيه والعكس صحيح لكن في كل الأحوال مش هنشوف قفزات كبيرة ومفاجئة زي ماكان يحصل قبل كده لأنه طول مافيه عملة كل ما سوق الصرف استقرت.
ولو هنمشي ورا التوقعات اللي جاية في الشهور الباقية من 2025 يبقي الجنيه هيكسب الدولار وهنقول لحضرتك ليه.. أول حاجة إن كل القطاعات اللي بتجيب أو تدخل دولار للبلد هتشهد قفزات مش مجرد زيادة في 2025 زي ما حصل في السياحة وتحويلات المصريين بالخارج والتصدير والاستثمار وحتي قناة السويس المفترض ترجع لطبيعتها مع هدوء الأجواء في البحر الأحمر وبداية عودة شركات النقل البحري للملاحة في القناة وفي نفس الوقت الدولة هتخلص من أخر أكبر سنة هتدفع فيها ديون وهي السنة الحالية وكمان متوقع تراجع فاتورة الاستيراد مع توطين الصناعة المحلية وكمان عودة مصر لمعدلات الانتاج الكبيرة في الغاز الطبيعي ودا كله هيوفر مليارت الدولارت كل سنة واللي بيودينا لوفرة الدولار واللي هتكون نتيجته نزول سعر العملة الأمريكية مقابل الجنيه المصري اللي هترتفع قيمته وقوته الشرائية.
وعلى صعيد التوقعات العالمية هنلاقي إن شركة الأبحاث فيتش سوليوشنز التابعة لوكالة فيتش للتصنيف الائتنماني أكدت نمو الاقتصاد المصري بنسبة 3.9% وتوقعت تداول الجنيه المصري بين حوالي 50 و55 جنيهًا مقابل الدولار الأميركي في 2025، وأن الجنيه هيتخلص من الضغط بعد الربع الأول من نفس السنة بسبب استحقاق أذون الخزانة، إضافة إلى قوة الدولار الأمريكي وعدم اليقين بشأن سياسات إدارة ترامب.
