الجنيه المصري رايح على فين في 2025؟.. هنقولك توقعات المؤسسات الدولية إيه؟
يا ترى ايه اللى هيحصل للجنية المصري أمام العملات الأجنبية الفترة الجاية ؟ وايه التوقعات عن مستقبل الجنية أمام الدولار تحديدا؟ وهل الاحتياطي النقدي من العملات الأجنبية فى البنك المركزي هيقدر يواجه التحديات الاقتصادية؟
في الشهور اللي فاتت… الجنيه المصري واجه ضغوط كبيرة قدام الدولار.. في ديسمبر 2024 سعر الدولار وصل لحوالي 50.63 جنيه.. وده أعلى مستوى ليه في التاريخ.. التقارير بتشير إن الجنيه ممكن يفضل في حالة تراجع معتدل خلال 2025.. مثلاً، "فيتش سوليوشنز" بتتوقع إن الدولار يشهد ارتفاعات خلال السنة دي.. وده نتيجة لزيادة الالتزامات الخارجية وقوة الدولار عالمياً.
طب إيه التوقعات للاحتياطي النقدي الأجنبي في مصر؟
الأرقام الرسمية من البنك المركزي المصري بتقول إن الاحتياطي النقدي وصل لـ47.27 مليار دولار بنهاية يناير 2025..و التوقعات بتشير لاستمرار النمو في الاحتياطي خلال السنة دي، وده بفضل زيادة الاستثمارات الأجنبية المباشرة وتحويلات المصريين في الخارج. مثلاً، "جي بي مورجان" بيتوقع إن الاحتياطي يزيد بحوالي 16.2 مليار دولار خلال العام المالي 2024/2025، و2.6 مليار دولار في العام اللي بعده.
طب هل فيه توقعات تانية بخصوص أداء الجنيه ؟
فيه طبعا تقارير تانية بتشير لاحتمالية تراجع أكبر للجنيه.. مثلاً "كابيتال إيكونوميكس" بتتوقع إن الجنيه يواصل التراجع قدام الدولار لو حصل تخفيض جديد لقيمة العملة.. كمان "أكسفورد إيكونوميكس" بتتوقع إن الجنيه يوصل يقدم أداء ضعيف قدامم العملة الأمريكية وده ممكن يساعد في تقليل الفجوة مع السوق السوداء.
طب إيه أصلا العوامل اللي بتأثر على سعر الجنيه ؟
في عوامل كتير بتأثر على سعر الجنيه، زي السياسة النقدية للبنك المركزي، والتضخم، والتدفقات النقدية من السياحة وتحويلات المصريين في الخارج، وكمان الأوضاع الاقتصادية العالمية.. وكمان زيادة الالتزامات الخارجية وقوة الدولار عالمياً بيزودوا الضغط على الجنيه.
وهل في إجراءات ممكن تساعد في تحسين وضع الجنيه؟
فيه إجراءات كتير ممكن تساهم في دعم الجنيه، زي تعزيز الاستثمارات الأجنبية، وزيادة الصادرات، وتحسين المناخ الاقتصادي العام.. و كمان تطبيق سياسات مالية ونقدية متوازنة ممكن يساعد في استقرار العملة.
وإيه التوقعات لمعدلات التضخم في الفترة الجاية؟
التوقعات بتشير لانخفاض معدلات التضخم خلال 2025.. مثلاً "بي إن بي باريبا" بيتوقع إن التضخم يوصل لمتوسط 19.8% خلال السنة المالية 2025، وحوالي 10% في السنة المالية 2026.. ومع توقع انخفاض معدلات التضخم، في احتمالية إن البنك المركزي يبدأ في خفض أسعار الفائدة بشكل تدريجي خلال 2025 وده بهدف دعم الاستثمار والنمو الاقتصادي.
نيجي لسؤال مهم.. إيه النصيحة للمواطنين في ظل التغيرات دي؟
من المهم متابعة التطورات الاقتصادية بشكل مستمر والتخطيط المالي الجيد.. وتنويع مصادر الدخل قدر الإمكان.. وكمان التفكير في استثمارات آمنة تتناسب مع التغيرات الاقتصادية الحالية.
واللى لازم الكل يبقا عارفه ان مستقبل الجنيه قدام الدولار والاحتياطي النقدي مرتبط بعوامل كتير.. زي الاستقرار الاقتصادي.. والتدفقات النقدية، والسياسات المالية.
