الصفقة السعودية الأضخم بعد رأس الحكمة.. مفاجأة في التفاصيل
ايه اللي بيحصل بين مصر ودول الخليج العربي اليومين دول وليه دول الخليج قررت تساند مصر باستثمارات ضخمة جديدة في الفترة الحالية .. وياترى الأرقام بتقول إيه.
طبعا العلاقات المصرية الخليجية مش محتاجة شرح ولا دليل على قوتها وإن الطرفين سند لبعض في كل الأزمات وفي ضهر بعض في الخطر وزي ما مصر ضهر قوى جدا للخليج من لي تهديدات كمان دول الخليج سارعت لمساندة مصر في كل الأوقات الحرجة ودا بتاكده الأرقام وزيارات الرؤساء والملوك وآخرها اجتماعهم في وجه التهديدات الأمريكية للمنطقة العربية واللي أثبتت أن العرب ملهمش غير بعض ودا سبب الاستثمارات الخليجية الجديدة اللي جاية في الطريق لأن قوة مصر هي قوة للخليج كله ولأن الاقتصاد المصري في حاجة اكتر للانطلاق دول الخليج اتحركت من تاني لدعم مصر وشفنا دا في التصريحات الأخيرة من قطر والسعودية والإمارات والكويت..
والبداية من السعوديه واللي سبق ووقعت مع مصر في أكتوبر اللي فات، اتفاقية تشجيع وحماية الاستثمارات المتبادلة بين البلدين، وتشكيل مجلس التنسيق الأعلى بين البلدين لتمهيد الطريق لمزيد من الاستثمارات السعودية الضخمة للسوق المصري وامبارح وزير الطاقة السعودي قال كلام مهم جدا خلال مشاركته بمؤتمر ومعرض مصر الدولى للطاقة ايجبس 2025 وإن جاري تشغيل 5 مشروعات طاقة متجددة سعودية "طاقة شمسية ورياح" في مصر، والأهم أنه قال إنه هيتم إقامة أكبر مشروع لطاقة الرياح لتعزيز قدرات مصر.
ورغم أن الوزير السعودي مقلش حجم الاستثمارات في المشروع الجديد لكن قال كلمة ممكن منها نفهم قيمة الاستثمارات السعودية في المشروع الجديد وهي إن الإمارات بتنفذ مشروع ضخم حاليا لطاقة الرياح في مصر باستثمارات تتجاوز 10 مليار دولار ومعنى كده إن المشروع السعودي هيكون أكبر من قيمة المشروع الاماراتي لأن وزير الطاقة السعودي قال إن المشروع هيكون الأكبر من نوعه في مصر..
الوزير السعودي قال كمان إن حجم استثمارات القطاع الخاص السعودي في مصر وصلت 35 مليار دولار، في وقت بلغت استثمار الشركات التابعة للصندوق السيادي السعودي في مصر 3 مليار دولار.
وأتكلم كمان عن مشروع الربط الكهربائى بين البلدين يعد الأكبر من نوعه في المنطقة ويهدف إلى تبادل 3 جيجاواط من الطاقة الكهربائية عند اكتمال مراحله السنة الجاية وقال إن المشروع سيساهم في دعم قدرات قطاع الطاقة في البلدين لمواجهة الطلب وضغوط الأحمال الكهربية بالاستفادة من فائض الإنتاج.
طبعاً الاستثمار في مجال الطاقة الكهربائية في مصر هيوفر مليارات الدولارات على الخزينة المصرية كل سنة هي نتاج استيراد الغاز الطبيعي من الخارج لتشغيل المحطات التقليدية لإنتاج الكهرباء ومصر استوردت باكتر من 15 مليار دولار غاز في 2024 وكمان مع اكتمال المشروعات دي مصر هتصدر كهرباء للخارج سواء العرب أو أوروبا من خلال مشروعات الربط الكهربائي..
كمان امبارح وزير المالية القطري كشف عن استثمارات قطرية جديدة في السوق المصري في الفترة الجاية لما قال إن السوق المصري من افضل الأسواق الناشئة للاستثمارات القطرية وقبلها تصريحات المسؤولين الكويتين حولين نفس الموضوع وقالوا إن العلاقات الاقتصادية بين البلدين هتشهد قفزة مع زيارة الرئيس السيسي المرتقبة للكويت.
