ذهب ولا عقارات ولا شهادات.. إزاي تختار الاستثمار الأنسب لك في 2025
يا ترى لو معاك فلوس وعايز تدخرها تحطها في إيه، إيه هي أفضل وسيلة ادخار موجودة دلوقتي، تحفظ فلوسك من ناحية، وتزودها من ناحية تانية، يا ترى هي الدهب ولا العقارات ولا الشهادات البنكية ولا حاجة تانية خالص.
طبعا كتير من الناس بيحتاروا يحطوا تحويشة العمر فين، خاصة مع زيادة التضخم أو ارتفاع الأسعار اللي بقي وحش بيبلع أي فلوس في جيوب الناس، وكمان مع زيادة الأزمات العالمية زي حرب غزة والحرب الاقتصادية بين أمريكا والصين، فكل دي عوامل بتزود التضخم وبتضيع معاه فلوس وتحويشات العمر.
ونقدر نقول إن التوترات الجيوسياسية والمنافسة بين الصين والولايات المتحدة الأمريكية دلوقتي هي كمان ساهمت في تعقيد الأمور وارتفاع التضخم، عشان كده لازم تحلق نفسك وفلوسك قبل ما تضيع.
دلوقتي يا سيدي، عندك كذا فرصة استثمار، منها الدهب والعقارات والشهادات الادخارية وأسواق المال، عشان كده هنقولك مزايا كل واحدة والأنسب لك.
نيجي لأول حاجة وهي الدهب، واللي بيعتبر ملاذ آمن للمستثمرين في أوقات عدم الاستقرار الاقتصادي، وفي الأوقات دي بيزيذ الإقبال عليه مع تصاعد التوترات الجيوسياسية وعدم الاستقرار العالمي، كمان الدهب بيمثل خيار كويس للمستثمرين الباحثين عن أصول مستقرة تقدر تحافظ على قيمتها.
أما أسواق المال، فهي كمان نوع مهم للاستثمار المرن ومتعدد الخيارات، فرغم إنه بيحقق عوائد مالية كويسة، لكنه بيعتمد على شوية عوامل، أهمها المدة الزمنية وظروف السوق والاقتصاد، يعني لازم تكون دارس كويس قبل ما تستثمر فلوسك في سوق المال.
عندك كمان، الاستثمار العقاري، اللي بيعتبر من الاستثمارات طويلة الأمد اللي بتحقق عوايد مالية كويسة جدا، إلا أن نجاحه بيرتبط بشوية عوامل، زي الموقع ونوع العقار والظروف الاقتصادية، فلازم يبقي نفسك طويل لو ناوي تحط فلوسك في العقارات لأن المكسب جاي جاي بس عايز شوية صبر.
برضو الشهادات الادخارية، هي نوع من الاستثمار الآمن واامستقر، ومش بس كده لأ ده كمان بيحقق عوايد مالية مضمونة، ولكن بيعتمد نجاحه على المدة الزمنية ونوع الشهادة، فلازم تختار شهادة كويسة وعوايدها مرتفعة وبأقل فترة زمنية.
وآخر نصيحة ممكن نقولها لك، هي إنك لو عايز تضمن المكسب أو الربح بشكل أكبر، فلازم حضرتك تنوعت استثماراتك، يعني شوية دهب وشوية شهادات وعقار مثلا عشان تقدر تحقق توازن بين العواقد والمخاطر، وتضمن المكسب بشكل أكبر.
