خطط مصر البديلة في مواجهة الضغوط الاقتصادية المحتملة
ايه خطط مصر البديلة لمواجهة أي ضغوط اقتصادية محتملة وازاي هتتغلب عليها وتواجه التحديات وياترى مصر هتقدر تعمل دا.
الدكتور مصطفى مدبولي طلع من كام يوم وقال إن مصر بتعمل حساب كل السيناريوهات المحتملة اللي ناتجة عن التمسك المصري بالحقوق العربية واحتمال مواجهة ضغوط اقتصادية من اي نوع وأكد أن الحكومة عندها خطط للتعامل مع أي تطورات .. ياترى الدولة المصرية ممكن تعمل ايه ؟
عشان نبقى عارفين الاقتصاد المصري فيه ميزة مهمة جدا تخليه يواجه اي تحديات أو ضغوط من اي نوع وهي أنه اقتصاد متنوع بمعني إنه مش معتمد على قطاع واحد يمكن حصاره بسهولة لكن عندها سياحة وعندها صناعة وزراعة وتجارة وموانئ وتحويلات خارجية ودا بيخلي عندها تنوع في مصادر الدخل الأجنبية لمواجهة أي مشاكل ممكن تحصل في الأيام الجاية وكمان مصر عندها أدوات قوة اقتصادية مختلفة منها الشراكات الاستراتيجية مع دول كتير في العالم زي الصين وروسيا وحتي أوروبا واللي بتحرص على التعاون مع مصر بشكل دائم ودا لحماية مصالحها اولا والتوثيق التعاون لأن استقرار مصر من استقرار أوروبا ومصر مانعة شر كبير على اوربا خاصة في موضوع الهجرة غير الشرعية من الدول الأفريقية ودا معناه أن أبواب أوروبا هتفضل مفتوحة للمنتجات المصرية وكمان استمرار الدعم الأوروبي لمصر.
كمان مصر عندها أسواق تانية تقدر تغير من خلالها بوصلة التعاون الاقتصادي والصادرات والأسواق دي بترحب بالتعاون مع مصر والاستفادة من إمكانياتها الاقتصادية والجغرافية والبنية الأساسية في الموانئ واللوجستيات وخطوط التجارة اللي بتتحكم فيها... كمان مصر ممكن تواجه ضغوط الدولار لو حصل من توسيع التعاملات بالعملات الوطنية مع دول كتير سواء في بريكس أو غيرها وكمان الحكومة ممكن تلجأ لتحويل الديون لاستثمارات للتخفيف من الضغط على الموارد الدولارية.
من بين خطط مصر المحتملة الاتجاه شرقا وتوسيع مدى الاستفادة والتعاون مع الدول واستبدالها بأي أسواق في حالة تصاعد الأمور ودا غير خطط تانية كتير ممكن تلجأ ليها زي خطط ترشيد الإنفاق والتوسع في الإنتاج المحلي بشكل عام لتفادي أي ضغوط اقتصادية أو وضع قيود على استيراد سلع بعينها ودا غير إن مصر عندها أوراق كتير تانية لمواجهة التحديات زي المعاملة بالمثل في حالة لجوء البعض لفرض قيود اقتصادية ومصر هي قلب الشرق الأوسط والقوى الإقليمية الرئيسية فيه وخسارتها هتكون خسارة للشرق الأوسط كله بالنسبة لأي دولة تفكر أنها تأذي مصر اقتصاديا.
مش عاوزين نسبق الأحداث لكن الاحتياط واجب زي ما بيقول المصريين ولازم نعمل حسابنا من دلوقتي على كل السيناريوهات الصعبة حتى لو كان حدوثها مستبعد لأن مصر دولة إقليمية كبيرة وليها تأثير قوى في المنطقة ومش هتسيب حاجة للظروف بدليل إن الحكومة سبقت وعملت احتياطي استراتيجي ضخم من كل السلع ودا كان البداية وكمان بعد نظر من صانع القرار.
