مشروع رأس الحكمة وصل فين؟ وامتى هنشوف المشروعات على أرض الواقع؟
يا ترى مشروع رأس الحكمة وصل لفين دلوقتي؟ وإمتى هنشوف أولى المشروعات على أرض الواقع؟ وليه الكلام عن المشروع قل مش زي الأول؟
في شهر أكتوبر اللى فات شهد الرئيس عبد الفتاح السيسي والشيخ محمد بن زايد آل نهيان إطلاق مشروع رأس الحكمة التنموي.. المشروع ده بيعتبر شراكة استثمارية ضخمة بين مصر والإمارات.. وبيهدف لتطوير مدينة متكاملة على مساحة 170 مليون متر مربع.. يعني أكتر من 40 ألف فدان باستثمارات مباشرة قيمتها 35 مليار دولار.
المدينة دي هتضم أحياء سكنية لكل المستويات.. فنادق عالمية.. منتجعات سياحية.. مشروعات ترفيهية عملاقة.. وكل الخدمات العمرانية زي المدارس الجامعات المستشفيات، والمباني الإدارية.. كمان هيكون فيها منطقة حرة خدمية خاصة بالصناعات التكنولوجية والخفيفة، وخدمات لوجستية، وحي مركزي للمال والأعمال لجذب الشركات العالمية.
المشروع اللي كله حماس واستثمارات ضخمة بقى على وشك إنه يتحول من مخطط على ورق لحقيقة تلمع على البحر الأبيض المتوسط.. و من أول ما اتدشن المشروع وفيه شغل كتير جدا بيحصل على الأرض.
المشروع ده اللي بيجمع بين أفضل الخبرات المصرية والإماراتية، وصل لمرحلة تصميم المخطط الرئيسي واللي بيشكل خارطة طريق لتحويل المنطقة لمدينة عمرانية متكاملة.
السؤال المهم هو : "إمتى هنشوف أول علامة من علامات المشروع على أرض الواقع؟
بحسب المصادر الرسمية والتصريحات اللي صدرت عن رئيس الوزراء مصطفى مدبولي، الشركة المطورة ناوية تبدأ أولى أعمال البنية التحتية والإنشاءات قبل نهاية السنة الجارية! يعني مش بعيد خالص إننا نشوف أولى خطوات المشروع على الشوارع والطرق والمرافق الأساسية.
وبالنسبة للمرحلة الأولى من المشروع الحكومة بدأت في تسليم أراضي المرحلة دي للمطور الإماراتي في مطلع أكتوبر 2024.. المرحلة دي بتشمل 10 آلاف فدان.. وبيتم التنسيق مع الأهالي لتعويضهم وتوفير مساكن بديلة ليهم.. كمان وزارة الإسكان أعلنت عن تدشين أكبر منطقة صناعية في المنطقة دي بهدف توفير فرص عمل وتوطين المنتج المحلي.
أما بقا موعد بدء تنفيذ المشروعات فمن المتوقع أن تبدأ الأعمال التنفيذية في النص التاني من 2025 بمدة تطوير للمرحلة العاجلة تصل إلى 5 سنيين.. يعني ممكن نشوف أولى المشروعات بتتفتح للجمهور بحلول عام 2030.
المشروع ده مش بس هيغير شكل الساحل الشمالي ده كمان هيكون ليه تأثير اقتصادي كبير.. وهيخلق فرص عمل كتير، وهيعزز مكانة مصر على خريطة السياحة العالمية. خلينا نتابع مع بعض التطورات ونتمنى نشوف المشروع ده.
