مفاجآت كامل الوزير تقلب الموازين.. هيعمل ايه
ايه حكاية المدن الصناعية الجديدة اللي كشف عنها كامل الوزير وايه اللي بيحصل في الساحل الشمالي كله وايه الجديد في مشروع رأس الحكمة وبرج العرب..
الوزير النشيط كامل الوزير أعلن النهاردة اكتر من مفاجأة سارة هتقلب موازين الاقتصاد المصري وبتقول أن البلد ماشية في الطريق الصحيح وإن اللي جاي كله خير وتنمية وتطوير وانطلاق رغم الظروف الصعبة اللي مرت وبتمر بيها المنطقة حولينا من كل ناحية..
طيب الوزير قال إيه النهاردة ؟
شوف ياسيدي الفريق كامل الوزير وزير النقل والصناعة طلع النهاردة وكشف اكتر من مفاجأة أولها أن الحكومة المصرية دلوقتي بتخطط لإنشاء مدينة صناعية جديدة بمدينة راس الحكمة على مساحة 30 مليون مربع، بخلاف المدينة الصناعية الخاصة بالشركاء الإماراتيين..
طيب ازاي هي منطقة رأس الحكمة دي مش للسياحة والترفيه بس؟
دا كلام مش حقيقي لأن المنطقة ضخمة والمشروعات السياحية والترفيهية جزء منها لكن زي ما قلنا مساحة المنطقة اكبر من حجم دول حولينا والخطة بتهدف لتحويلها لقاطرة الاقتصاد المصري في الشهور والسنين الجاية وهتكون فيها مجتمعات اقتصادية شاملة وحديثة ومتطورة يعني هيكون فيها مناطق صناعية ضخمة وموانئ ومطارات ودا بخلاف المشروعات السياحية واللي هتغير شكل السياحة في المنطقة كلها مش في مصر بس ولما تخلص مشروعات رأس الحكمة مصر هتستقبل ملايين السياح بشكل إضافي وهتحقق اكتر من 30 مليون سائح بكتير ودا لأن المشروعات دي هتكون الأضخم من نوعها وهتوطن وتجذب اشهر البراندات العالمية في الفنادق والترفيه والتسويق.
ليه رأس الحكمة هتقلب الموازين ؟
عشان زي ما قلنا لحضرتك حجم اللي بيتنقذ فيها من مشروعات هيدخل للبلد مليارات الدولارات كل سنة للخزينة المصرية ومتنساش إن مصر ليها 30% من حصيلة المشروعات حسب الاتفاقيات مع الجانب الإماراتي وغير اللي بتحصله الدولة بشكل غير مباشر من مكاسب زي توفير فرص العمل للشباب المصري والرسوم والجمارك وانتعاش حركة التجارة وتوفير السلع في السوق المحلي من المناطق الصناعية الجديدة في المنطقة.
مش بس كده دا الوزير قال كمان انهةبيتم التخطيط لإنشاء مطار دولي بمدينة رأس الحكمة، لخدمة السياحة والمناطق الصناعية الجديدة زي ما قلنا وحسب المعلومات هيكون مطار عالمي لخدمة حركة السياحة في المنطقة بجانب مطارات العلمين وبرج العرب وبمناسبة برج العرب فالوزير كشف مفاجأة تانية وعي إن وزارة النقل بتعتزم تنمية 100 مليون متر مربع في مدينة برج العرب الجديدة لتحويلها إلى منطقة صناعية تضم مصانع لكبرى الشركات وإنه بيتم تجهيزها حاليا بالمرافق والسكك الحديد والقطار السريع، لتكون الظهير الصناعي لمنطقة الساحل الشمالي.
كل المشروعات دي بتقول إن الدولة ماشية في خطط التنمية الاقتصادية بشكل قوى وإن الساحل الشمالي هتتحول لكنز اقتصادي مصري هيقلب موازين التجارة والاقتصاد في الشرق الأوسط كله لأنها مشروعات متكاملة قادرة على جذب مليارات الدولارات استثمارات كل سنة.
