ليه الحكومة مهتمة أوي بتحويل السيارات للعمل بالغاز الطبيعي؟ هنقولك الدولة بتفكر في إيه؟
يا ترى إيه هو الجديد في ملف تحويل السيارات للعمل بالغاز الطبيعي بدلا من البنزين، وليه الحكومة بتتوسع في المشروع ده دلوقتي وإيه هي آليات التنفيذ، هل في مكاسب اقتصادية من وراه ولا لأ.
في الفترة الأخيرة، الحكومة كثفت اهتمامها بمشروع إحلال العربيات أو السيارات القديمة، عشان يتم تحويلها للعمل بالغاز الطبيعي بدل من البنزين والسولار، وده ضمن مبادرة رئاسية بتستهدف تطبيق وتعميم الفكرة في أسرع وقت ممكن.
ونقدر نقول، إن في آليات لتنفيذ المبادرة دي، وبتبدأ من إجراءات الفحص الفني العربيات، عشان نشوف هل تصلح للتحويل ولا لأ، وبعد كده بيتم التحويل والصيانة في حالة إن حالة العربية كويسة ، عشان الموضوع ينتهي بالتحويل وضمان الجودة والسلامة.
وبالنسبة للتكلفة الاقتصادية، فبتقوم الخزانة العامة للدولة بتحمل الجزء الأكبر من تكلفة التحويل، والحكومة بتستهدف من الخطوة دي، دعم المواطنين وتشجيعهم على الاستفادة من الغاز الطبيعي كوقود بديل للسولار والبنزين.
وكل ده عاشت الغاز الطبيعي بيُعتبر خيار اقتصادي كويس جدا مقارنة بالوقود التقليدي، عشان بيساهم في تقليل نفقات التشغيل للمواطنين، وكمان بيقلل الآثار البيئية السلبية الناجمة عن استخدام الوقود التقليدي.
أما بالنسبة للفوايد الاقتصادية للمشروع، فبتتخلص في خفض التكاليف التشغيلية، وده لأن الغاز الطبيعي زي ما قولنا هو وقود اقتصادي مقارنة بأسعار البنزين والسولار، وده في حد ذاته بيخفف العبء المالي على المواطنين، وده بيعكس كمان التزام الحكومة بتحقيق التنمية الاقتصادية والمحافظة على البيئة في وقت واحد.
كمان، المبادرة دي لها فوايد على البيئة، لأنها هتقلل الانبعاثات الكربونية، لأن استخدام الغاز الطبيعي هيعزز من تحسين جودة الهواء وخفض الانبعاثات الضارة، وده هينعكس بشكل إيجابي على الصحة العامة للمواطنين.
وبرضوا من ضمن المكاسب، هو توافر الوقود، يعني الغاز موجود على طول في مختلف أنحاء الجمهورية، وده بيضمن استدامة الإمدادات وبيقلل الاعتماد على الوقود المستورد.
كمان، في رؤية مستقبلية مستدامة، وده لأن المبادرة دي بتيجي ضمن استراتيجية الدولة للتحول نحو الاقتصاد الأخضر وتقليل الاعتماد على الوقود الأحفوري التقليدي، تماشياً مع رؤية مصر 2030، عشان كده في توقعات بأن المبادرة تقدر تساهم بشكل كبير في تحسين البيئة، وكمان الاقتصاد الوطني، وخلق فرص عمل جديدة في مجالات الفحص والتحويل والصيانة.
وأخيرا، لو حضرتك عايز تستفيد من مبادرة تحويل السيارات للعمل بالغاز الطبيعي، فلازم تسجل على المنصة الرسمية للمبادرة، وتقدم المستندات المطلوبة، عشان بعد كده يتم التواصل معاك عشان يتم الفحص الفني لعربيتك وتقدر اللجنة تحدد إمكانية تحويلها للعمل بالغاز الطبيعي ولا لأ.
بعد كده، هيتم استكمال إجراءات التحويل في المراكز المعتمدة، عشان تكون حولت عربية لسيارة صديقة للبيئة بنجاح، وفي نفس الوقت تكون استفدت من المبادرة.
