مصر تفتح خط أسرع لصادراتها الزراعية.. مضاعفة رحلات الرورو مع إيطاليا
صادرات مصر الزراعية على طريق أسرع لإيطاليا.. ورحلات الرورو بتتضاعف.
مصر بتتحرك لتسهيل وصول صادراتها الزراعية للأسواق الأوروبية، من خلال مضاعفة رحلات الرورو مع إيطاليا، في خطوة تستهدف تسريع نقل المنتجات المصرية وتقليل الوقت اللازم لوصولها للمستهلك الأوروبي.
ونظام الرورو بيعتمد على نقل الشاحنات المحملة بالبضائع على متن السفن، وبعد وصولها للميناء بتكمل طريقها برًا، وده بيساعد على تسهيل حركة المنتجات من غير الحاجة لتفريغ كل شحنة وإعادة تحميلها بشكل منفصل.
وأهمية الخط ده بتزيد خصوصًا مع الصادرات الزراعية، لأن منتجات زي الخضراوات والفاكهة بتحتاج سرعة في النقل للحفاظ على جودتها وتقليل الفاقد.
والجديد إن الرحلات زادت من رحلة واحدة أسبوعيًا إلى رحلتين، يومي الثلاثاء والجمعة، بين ميناء دمياط وميناء تريستا الإيطالي، وده بيوسّع فرص نقل المنتجات المصرية لأوروبا.
الخطوة دي ممكن تدي الصادرات الزراعية المصرية فرصة أكبر للمنافسة.. وتخلي وصولها للأسواق الأوروبية أسرع وأسهل.
