إيه حكاية حقول كينج مريوط الجديدة.. مفاجأة في التفاصيل
هو ليه رئيس الحكومة مصطفى مدبولي مكشفش تفاصيل الاكتشافات البترولية اللى قال عليها في المؤتمر الصحفي الأخير وايه اللي بيحصل بالظبط في كينج مريوط.
الدكتور مصطفى مدبولي رئيس الحكومة طلع في اخر مؤتمر صحفي واتكلم في حاجات كتير مهمة خاصة بزيادة المرتبات وتوفير السلع في رمضان والشركات المصرية في الخارج لكن قال حاجة مهمة جدا الناس وقفت عندها كتير وهي تحقيق اكتشاف مزدوج للبترول والغاز في منطقة امتياز كينج مريوط في السواحل المصرية الشمالية من خلال شركة بريتش بتروليوم البريطانية.
الغريبة إن مدبولي مقالش تفاصيل كتيرة عن حجم الإنتاج والاحتياطي المتوقع من الخام لكن اكتفي بالقول إن الاكتشاف واعد وإن أرقامه هيتم الإعلان عنها بالتفصيل في الأيام الجاية.
طيب ليه مدبولي ماأعلنش التفاصيل ؟
عشان ببساطة كلام مدبولي بيقول إن الاكتشاف ضخم وواعد ودا للي الشركة المنتجة بتعرفه بسهولة مع الحفر لكن حجم الاحتياطي النهائي ونوع الخام وحاجات تانية فنية لسه مخلصتش تقريبا ودا غير انه في الاكتشافات الكبيرة الشركات العالمية بتفضل تكشف بنفسها عنه على سبيل الدعاية زي ما حصل مع شركة إيني الإيطالية ودا بيرفع أسهم الشركات دي في أسواق المال العالمية وبيرفع من قيمة الشركة واي اكتشاف جديد هو مكسب مركب للشركات دي وغالبا الشركة البريطانية هتختار الوقت المناسب للإعلان عن كشف كينج مريوط.
مدبولي فسر استمرار الاكتشافات البترولية والغاز في الفترة الأخيرة بزيادة استثمارات شركات التنقيب ودا بعد انتظام الدولة في سداد مستحقات الشركاء الأجانب واللي قررو التوسع في أعمال الحفر والاستكشاف ومن ايام مصر كشفت عن حقل بترول جديد باحتياطي أولي 8 مليون برميل في خليج السويس.. وفي نفس الوقت وافق مجلس الوزراء على 5 مشروعات اتفاقيات التزام بترولية بين الهيئة المصرية العامة للبترول، والشركة المصرية القابضة للغازات الطبيعية، وشركة جنوب الوادي المصرية القابضة للبترول، وعددٍ من الشركات العالمية في إطار حرص الشركات العالمية على ضخ استثمارات جديدة، وزيادة معدلات الإنتاج سعياً لتحقيق الاستفادة القصوى من مناطق عملها الاستكشافية والإنتاجية، وإحراز اكتشافات جديدة.
مدبولي قدر الحد الأدنى للاستثمارات بمشروعات الاتفاقيات بحوالي 225.3 مليون دولار، وحفر 40 بير بحد أدنى، في مجال البحث عن الغاز والزيت الخام واستغلالهما في منطقة ميرنيث البحرية بالبحر المتوسط، ومجال البحث عن البترول واستغلاله في كُلٍ من المناطق المُندمجة للبحث والتنمية جنوب شرق مليحة وشركة كنايس وتنمية غرب الرزاق بالصحراء الغربية، ومنطقة تنمية وادي السهل بالصحراء الشرقية، ومنطقة جنوب وادي السهل بالصحراء الشرقية ومنطقة شمال سيناء البحرية بالبحر المتوسط.
طبعا اي زيادة في إنتاج البترول او الغاز بيوفر مليارات الدولارات على مصر وكفاية تعرف إن الحكومة استوردت غاز في 2024 باكتر من 15 مليار دولار بسبب زيادة الاستهلاك وانخفاض انتاج الوقود.
