مصر تجني ثمار بنيتها الأساسية.. مشروع أوكراني مفاجأة
يعني ايه مصر هتتحول لمركز للغذاء في المنطقة.. وايه حكاية زيارة الوفد الأوكراني لمصر الأخيرة وايه علاقته بموانيء مصر وقناة السويس.
مصر بقي عندها بنية أساسية عملاقة تقدر بيها تعمل اي مشروعات ضخمة وتستوعب اي استثمارات من بره ومع موقعها الجغرافي المتميز وتحكمها في خطوط تجارة دولية مهمة جدا مصر بقت تستقبل مليارات الدولارات عشان موقعها دا والبنية الأساسية الحديثة.
يعني ايه الكلام ده وايه مناسبته؟
يعني باختصار كده احنا يا مصريين عندنا كنز نادر اسمه الموقع الجغرافي وقناة سويس وبحر متوسط وأحمر بيعتبر مركز التجارة الدولية والعالم كله بيعدي من قدامها وفي مياهها الوطنية ودا غير قربها من كل الأسواق الهامة في العالم ودي ميزة خلت مصر قبلة للاستثمارات الدولية ولسه الجاي اكبر بكتير من الأرقام والمليارات اللي انتوا سمعتوها.. والموقع الجغرافي مع البنية الأساسية الحديثة اللي عملتها الدولة هما درع مصر الدفاعي في الحروب الاقتصادية العالمية دلوقتي لأن السوق اى مري بقت ملاذ آمن للاستثمارات الدولية والعابرة للقارات.
مصر بدأت من فترة تجني ثمار موقعها الجغرافي والجهد اللي اتعمل من سنين في إنشاء الطرق والمحاور والموانئ والمناطق اللوجستية وشبكات السكك الحديدية اللي ربطت المواني ببعضها والمناطق الإنتاج وشفنا حجم الاستثمارات اللي استقبلتها المنطقة الاقتصادية لقناه السويس والساحل الشمالي والمدن الجديدة .. واخر المشروعات العملاقة اللي جاية مصر بسبب موقعها الجغرافي وبنيتها الأساسية الحديثة كان المشروع اللي كشف عنه وزير الزراعة الأوكراني فيتالي كوفال من كام ساعة لما قال إن بلاده بتدرس إمكانية فتح مركز لوجستي في مصر لتوريد المنتجات الزراعية الأوكرانية إلى المنطقة.
وقال كوفال واللي زار مصر في الساعات اللي فاتت إنه بناء على تعليمات الرئيس الأوكراني فولوديمير زيلينسكي فيه وفد أوكراني بيستكشف إمكانية إنشاء مركز للغذاء في مصر وقال الوزير أنه تفقد مع سفير أوكرانيا في مصر البنية التحتية للموانئ والمواقع اللي ممكن للشركات الأوكرانية وضع مرافقها فيها وعلي فكره دا خبر مهم جدا لانه جاي في توقيت حساس جدا وتأثر سلاسل الإمداد عالميا ولان أوكرانيا منتج ومصدر عالمي للحبوب والبذور الزيتية والزيوت النباتية والسوق الافريقي بالنسبة ليها مهم جدا دلوقتي.
طيب مصر هتستفيد ايه من المشروع دا؟
طبعا مصر اكتر دولة هتستفاد من تحولها لمركز إقليمي للمنتجات الزراعية الأوكرانية لأن المشروع هيضمن استمرار واستدامة تدفق الحبوب والمنتجات الزراعية وخاصة القمح وهي السلعة الاستراتيجية في مصر وفي نفس الوقت المشروع هيحمي مصر من التقلبات السعرية نتيجة التوتر في سلاسل الإمداد زي ما قلنا وغير إنه مصر هتاحد عوائد مادية لدا وكمان السوق المحلي المصري هيكون ليه الأولية ودا غير أن المشروع في حد ذاته استثمار اجنبي كبير وفيه شركات أوكرانية كتير هتيجي تشتغل في مصر ودا غير الأهمية السياسية في المشروع لما مصر تكون متحكمة في تصدير المنتجات لأهم منتج زراعي في العالم.
وعلي فكرة كل دا مكنش هيتحقق لولا أن الوفد الأوكراني اللي بيزور مصر شاف على الطبيعة حجم وقوة المواني المصرية وخطوط التجارة والطرق الحديثة والموقع المتميز واللي هيخلي مصر مركز عالمي في جذب الاستثمارات الأجنبية والتحكم في حركة التجارة الدولية ودا كله معناه دولارات جديدة وصخمة هتضخ في السوق المصري.
