دهب مصر .. احترافية البنك المركزي في تعظيم الاحتياطي
احترافية في التعامل مع الظروف الصعبة وحرفية في توقيت اتخاذ القرار المناسب في الوقت المناسب والأهم القدرة على الاستفادة من الأزمات في تحقيق نتائج جبارة.. دا باختصار الل حصل وبيحصل في البنك المركزي المصري.. تعالو نشوف إيه الحكاية.
البنك المركزي المصري هو المايسترو اللي بينظم السياسة المالية للدولة وهو المسئول عن تدبير العملات الأجنبية وخاصة الدولار ودا غير وظيفته الاساسية في الاشراف على البنوك العاملة في مصر وضمان أموال العملاء فيها.. وعلى مدار السنتين اللي فاتوا البنك المركزي المصري بقيادة المصرفي المخضرم حسن عبد الله كان هو بطل المشهد واللي قدر بقوته وحكمته واحترافيته في مواجهة اخطر الازمات المالية والاقتصادية اللي مرت على مصر من بدايات 2022 مع اندلاع الأزمة الروسية الاوكرانية وخروج الأموال الساخنة وتوحش السوق السودا للعملة وقدر بمرونة وتحركات سريعة إنه يروض الدولار ويقفل السوق السودا وينهي التلاعب في أسواق الصرف.
وأهم الملفات اللي تفوق فيها البنك المركزي على نفسه هي قدرته على بناء احتياطي نقدي قوي في ذروة أزمة الدولار ودي في عالم الاقتصاد مهمة شبه مستحيلة ووصل الاحتياطي النقدي لأكتر من 47 مليار دولار.
كمان قفزت قيمة إجمالي أرصدة الدهب لدى البنك المركزي المصري واللي بتعتبر ضمن مكونات الاحتياطي النقدي للدولة المصرية بنحو 107.7% خلال 2024 بزيادة قيمتها 280.2 مليار جنيه باجمالي 540.4 مليار جنيه بنهاية ديسمبر اللي فات مقابل 260.2 مليار جنيه بنهاية ديسمبر 2023.
قوائم المركز المالي للبنك المركزي كشفت كمان عن زيادة أرصدة الدهب لدى المركزي بحوالي 23.2 مليار جنيه خلال الربع الأخير من 2024..
طبعا البنك المركزي كان حريص إنه يستفاد من زيادة أسعار الدهب وقدر يشتري أطنان من الدهب في وقت الرخص زي ما بيقول المصريين ولو فاكرين الصحافة العالمية اتكلمت إزاي عن البنك المركزي المصري لما اشتري 44 طن دهب في فبراير 2022 ووضغتع كأكبر مشتري للمعدن الأصفر بين البنوك المركزية العالمية وقتها والناس استغربت ليه المركزي اشتري كل الدهب دا..
لو هنروح للأرقام هنعرف إن أسعار الدهب قفزت عالميا لمستويات تاريخية خلال 2024 ووصلت الى 2790 دولار للأونصة وتجاوز إجمالي الزيادة في سعر الدهب 35% تقريبا من بداية 2024.
طيب إيه فايدة ارصدة الدهب في المركزي؟
زي ما قلنا لحضراتكم إن الدهب جزء أساسي من مكونات الاحتياطي النقدي لمصر ولكل الدول والبنوك المركزية العالمية والاسواق بتتعامل معاه على أساس إنه نقدي واحتياطي الدهب بيكون مؤشر قوي على القوة المالية لأي دولة وعامل جاذب للاستثمارات كمان زيه زي توافر الدولار في الأسواق.
