أصعب ملفين بيواجهوا الحكومة.. الدولة هتعمل إيه مع التضخم والمالية العامة؟
يا تري هي إزاي الحكومة المصرية هتحسن حياة المواطنين، وايه مستهدفاتها من الجملة، هل تقصد انها هتزود الرواتب وتخفض الأسعار قريب، ولا عندها خطط اقتصادية مختلفة تقدر من خلال تزود معدل النمو الاقتصادي وتحسن الحياة العامة.
في الساعات الأخيرة، الدكتورة رانيا المشاط وزيرة التخطيط والتعاون الدولي، قالت إن الحكومة شغالة دلوقتي على مجموعة من السياسات عشان تظبط أوضاع المالية العامة، وكمان تعمل حوكمة للستثمارات عشان تقدر تمكن القطاع الخاص من العمل اكتر، وتحد من معدلات التضخم او ارتفاع الأسعار.
عشان كده، دلوقتي الحكومة شغالة من نار، في كل المجالات، وبتقوم دلوقتي بزيادة الاستفادة من الموارد المحلية والأجنبية وتحسن استغلالها، عشان تقدر تحقق النمو الشامل والمستدام، رغم التحديات اللي بتواجه الاقتصاد المصري من سنة 2020، ده غير التوترات الإقليمية والدولية، واللي ساهمت في الحد من معدلات النمو قبل كده.
لكن مع اتجاه البنوك المركزية للتيسير النقدي مع بداية سنة 2025، فمتوقع إ التضخم العالمي ينخفض وبالتالي الأسعار هتنزل في جميع دول العالم ومن بينها مصر، وهيتم الاتجاه لمزيد من الإجراءات الطبيعية في السياسة النقدية اللي بتهدف لتحفيز النشاط الاقتصادي بدون أي تأثير على استقرار الأسعار.
خد عندك، إن معدلات التضخم في مصر، شهدت ارتفاعات متتالية من سنة 2020 بسبب أزمة كورونا وتأثيراتها الاقتصادية على مستويات الأسعار، وده كان سبب كافي عشان يساهم في ارتفاع التضخم، لكن دلوقتي الحكومة المصرية شغالة على مجموعة من السياسات المتناقسة والمتكاملة، عشان تطبط الأوضاع المالية العامة.
ومش بس كده، دي بتستهدف كمان تخفيض معدلات التضخم من خلال السياسات النقدية دي، وكمان تخفض الإنفاق الاستثماري وتعمل سقف للاستثمارات العامة، عشان كل ده في النهاية بيخفص معدلات التضخم.
ومن ضمن الأخبار السعيدة، إن نجاح جهود مصر لوقف الحرب في غزة، هينعكس بشكل إيجابي على عودة حركة الملاحة لقناة السويس مرة تانية، وده هيمكنا من تعزيز من تدفقات النقد الأجنبي للسوق المحلية.
وأخيرا، انخفاض معدلات التضخم، هيساهم في تعزيز الثقة بين المستثمرين المحليين والأجانب، وهيخلق حالة من الاستقرار الاقتصاد، وكل ده هيصب في صالح المواطن لأن مش هيحصل غلا تاني، في الوقت اللي الحكومة بتطبق فيه التنمية المستدامة وبتوفر فيه ملايين فرص العمل للشباب.
وطبعا كل دي إجراءات هتحسن حياة المصريين، والشعب هيحس بحالة من الرضا بشكل كبير عن أداء الحكومة، وهو ده المطلوب في الفترة الجاية.
