استنوا 5 شهور.. إيه اللي بيحصل في سوق السيارات؟
هو سوق السيارات رايح علي فين وامتي الأسعار هتنزل وليه الخبرا بينصحوا بالانتظار للنص التاني من 0225 وإيه اللي هيحصل وقتها.
لسه الأسعار عالية في سوق السيارات رغم حالة الركود اللي سيطرت على المبيعات نتجية الارتفاع المبالغ فيه في أغلب أنواع السيارات الزيرو والمستعمل ولأن الأزمة في سوق السيارات طولت الناس بدأت تسأل هي أمتى أسعار السيارات هتنزل وتكون في متناول اليد وخاصة إن السيارة دلوقتي بقت سلعة ضرورية عند ناس كتير.. ودا بيخلينا نطرح نفس السؤال هو إيه اللي بيحصل في السوق دلوقتي؟
عشان نفهم الحكاية لازم نعرف إن أزمة سوق السيارات الحقيقية بتنحصر في 3 عوامل أولها تصنيف السيارات إنها سلعة ترفيهية وعشان كده الحكومة حظرت استيرادها من الخارج في ذروة أزمة الدولار ودا أثر طبعا على المعروض واللي تآكل بسرعة كبيرة نتيجة زيادة الطلب ومن هنا بدأت الزيادات الجنونية في سعر السيارات وسمعنا عن الأوفر برايس أو المبالغ اللي بييضيفها التاجر فوق سعر العربية عشان يأمن نفسه من تقلبات سعر الدولار وتاني حاجة وهي الأهم إن مصر مكانش عندها صناعة سيارات قوية وكان اغلب الموجود عبارة عن تجميع سيارات في المصانع المصرية عشان الشركات الأم متدفعش جمارك والسبب التالت هو تقلبات سعر الدولار واللي كان السبب الأساسي طبعا في ارتفاع كل السلع المستوردة مش بس السيارات.
طيب الدولة عملت ايه عشان تحل أزمات سوق السيارات؟
الحقيقة الحكومة اتحركت على أكتر من اتجاه مهم أولها إحياء صناعة السيارات في مصر بشكل حقيقي وعلمي وبدأت دا في اتجاهين أولها رجعت الشركات المصرية العريقة اللي كانت بتصنع زي النصر للسيارات وحدثت خطوط انتاجها وبدأت بالفعل تنتج والاتجاه التاني كان جذب الشركات العالمية لإقامة مصانع سيارات ليها في مصر من الألف الي الياء ونجحت فعلا الحكومة في استقطاب شركات عالمية لصناعة السيارات في السوق المصري وفي نفس الوقت الحكومة رجعت نظمت قواعد استيراد السيارات من الخارج.
طيب أسعار السيارات رايحة على فين؟
أصحاب السوق في شعبة السيارات باتحاد الغرف التجارية توقعوا استقرار أسعار السيارات خلال 2025 لكن بشرط استمرار العوامل الحالية زي ثبات سعر الصرف وعدم حدوث تغيرات مفاجئة، بجانب استقرار المعروض من السيارات وزيادة الإنتاج المحلي وخلي بالك بيتكلموا هنا عن استقرار مش نزول السعر واللي هيجي في مرحلة تانية بعد تلبية الطلب المتراكم في السوق على السيارات.
أعضاء الشعبة أكدو إن سوق السيارات في مصر هيشهد انفراجة حقيقية في النص التاني من السنة ودا لأن المصانع الجديدة اللي قلنا عليها هتكون بدأت العمل محليا سواء كانت صينية أو من شركات تانية وطبعا بدء الانتاج معناه زيادة المعروض من السيارات في السوق المحلي.
والشعبة قالت كمان إن أسعار كتير من السيارات هتنزل لأقل من مليون جنيه ودي مرحلة أولي قبل استمرار النزول مع زيادة المعروض من السيارات خلال السنة الحالية.
