أبرز أعضائها ساويرس وهشام طلعت مصطفى وأحمد عز وابن هيكل.. إيه حكاية لجان التواصل مع القطاع الخاص اللي شكلتها الحكومة؟

عارف إنك ممكن تسأل .. يعني إيه لجان استشارية مع القطاع الخاص؟ وليه الحكومة بتركز عليها دلوقتي؟ ةإيه الدور الحقيقي لليجان دي؟ وليه القرارات دي ممكن تكون نقطة تحول في مناخ الاستثمار؟

الدكتور مصطفى مدبولي رئيس مجلس الوزراء أعلن عن تشكيل 6 لجان استشارية متخصصة.. الهدف الأساسي منها هو تعزيز التواصل بين الحكومة والقطاع الخاص بشكل مباشر.

تخيل يكون عندك فريق بيجمع أهم العقول والخبراء من القطاع الخاص عشان يساعد الحكومة في حل مشاكل وتحديات الاقتصاد.. الموضوع مش مجرد "اجتماعات وشاي وقهوة".. دي خطوة استراتيجية لتغيير قواعد اللعبة الاقتصادية في مصر.

طيب ليه تم تشكيل اللجان دي؟

لأن الحكومة عايزة تبني قنوات مفتوحة ومستدامة لتبادل الأفكار وحل المشاكل وصياغة سياسات أفضل تدعم الاستثمار والاقتصاد.. واللجان دي أداة قوية لتحليل التحديات واقتراح حلول عملية وتقديم استشارات على أعلى مستوى… وده بيتحقق من خلال مجموعة من المهام الأساسية زي تقديم تقارير دورية بتشخيص المشكلات اللي بتواجه القطاعات المختلفة واقتراح خطط وحلول متكاملة لدعم التنمية وتقييم السياسات الحالية وتأثيرها على القطاع واقتراح آليات جديدة لتعزيز التنافسية على المستوى الدولي.. وده كله مش بيتم بشكل عشوائي.. اللجان دي هتشتغل مع وزراء ومسؤولين كبار وبتجتمع بشكل دوري مرة كل شهر أو أكتر لو لزم الأمر.

وخد بالك اللجان دي مش مجرد أسماء على الورق.. دب فيها أبرز الخبراء ورجال الأعمال من كل قطاع.

مثلا لجنة الاقتصاد الكلي .. فيها أسماء كبيرة زي حسن هيكل نجل الكاتب الكبير الراحل الأستاذ هيكل وكريم عوض.. الناس دي خبرتهم بتغطي استراتيجيات التمويل والاستثمار.

ولجنة تنمية الصادرات فيها أحمد عز وهاني برزي اللي ليهم دور محوري في تعزيز الصادرات المصرية.

ولجنة الاقتصاد الرقمي وريادة الأعمال وده بقي الفريق اللي فيه ناس زي عمر الصاحي (مدير أمازون مصر) وماجد محمود ودول بيعرفوا ازاي يحولوا أي فكرة لشغل ملموس.

غيرهم كمان في السياحة اللى فيها هشام طلعت مصطفي، والدكتور كامل حسن أبو علي، وحامد الشيتي ودي اسماء عملاقة فى القطاع السياحي.

ولجنة  التنمية العمرانية، والسياسة.. و كل لجنة مكونة من نخبة من أصحاب الخبرة اللي يقدروا يغيروا معادلات اللعبة.

طب ليه الخطوة دي مهمة؟

ببساطة لأن مصر محتاجة تدعم القطاع الخاص بشكل أكبر.. وده مش كلام إنشائي.. القطاع الخاص هو محرك أساسي للنمو الاقتصادي وتطوير السياسات بمشاركته بيدي رؤية حقيقية وواقعية لحل المشاكل.. كمان وجود لجان بالشكل ده معناه توفير حلول مبتكرة تخدم التنمية المستدامة وجذب استثمارات أكتر لأن المستثمرين هيشوفوا إن في خطة واضحة بتستعين بالخبراء وتعزيز التنافسية الدولية سواء في الصادرات أو التكنولوجيا.

النهج ده هو اللي ممكن يحطنا على خريطة الاستثمار العالمية بشكل قوي.. لأن ببساطة لما الحكومة والقطاع الخاص يشتغلوا سوا بروح الفريق النتائج بتكون خارقة.