بعد رأس الحكمة.. صفقة صينية بـ10 مليارات دولار في السوق المصري
إيه حكاية الصفقة الصينية الجديدة في مصر وازاي بتعتبر تاني أكبر صفقة بعد رأس الحكمة وازاي هتغير موازين الصناعة في مصر.
معروف إن العلاقات الاقتصادية بين مصر والصين علاقات قديمة جدا وممتدة وبكين طول الوقت عينها على فرص الاستثمار المتاحة عندنا وحاليا ليها مشروعات كبيرة وضخمة فى أماكن متفرقة فى مصر أهمها طبعا وجودها القوي في منطقة قناة السويس بمشروعات عملاقة هتغير خريطة الاستثمار فى مصر وكمان الصين عضو مؤسس في تجمع بريكس اللي انضمت ليه مصر في الفترة الأخيرة واللي فتحت مجالات تعاون ملهاش حدود بين البلدين بجانب مشروع طريق الحرير الصيني واللي التنين الصيني بيعول على مصر بشكل كبير في نجاحه.
وبلغة الأرقام الرسمية وصل عدد الشركات الصينية العاملة في مصر الى 2066 شركة باستثمارات تجاوزت الـ 8 مليار دولار وحاليا فيه خطة بتنفذها الحكومة لزيادة أعداد المستثمرين الصينيين من خلال تهيئة مناخ استثماري جاذب بجانب أن الصين عندها منطقة صناعية ضخمة في اقتصادية قناة السويس واسمها تيدا ونجحت في جذب استثمارات ب8 مليار دولار كمرحلة أولى والمنطقة الصينية دي بتعتبر قاعدة صناعية ضخمة للتصدير من مصر للأسواق القريبة لأنها منطقة واعدة لقربها من قناة السويس والممرات التجارية الدولية.
طيب ايه الجديد في الاستثمارات الصينية في مصر؟
اخر صفقات التنين الصيني في مصر هي إعلان شركة آسيا- بوتاس الصينية، ضخ استثمارات تتراوح ما بين 7 و 10 مليار دولار في مصر لتنفيذ مشروع متكامل للأسمدة الفوسفاتية والشركة بتخطط بشكل مبدئي لإقامة مجمع صناعي لإنتاج الأسمدة الفوسفاتية في مصر من خلال ضخ استثمارات بقيمة 1.6 مليار دولار في المرحلة الأولى لاستكشاف واستخراج 2 مليون طن من الفوسفات سنوياً وتحويلها إلى أسمدة فوسفاتية وتصدير 100% من الإنتاج إلى الأسواق المجاورة.
والشركة أعلنت أنها بتتوقع توصل الاستثمارات الإجمالية لكل مراحل المشروع من 7 إلى 10 مليارات دولار، ووصول الطاقة الإنتاجية النهائية للمشروع 10 ملايين طن من الفوسفات وأكد زينج يوي، نائب رئيس شركة (آسيا- بوتاس) تزايد اهتمام العديد من المؤسسات الصينية بعقد شراكات استثمارية مع الجانب المصري، وضخ استثمارات مرتفعة القيمة المُضافة في بيئة استثمارية جاذبة مثل السوق المصرية.
مسؤول الشركة قال كمان إن الشركة بتخطط للشراكة مع مشروعات إنتاج الأمونيا الخضراء المخطط تشغيلها في مصر خلال السنوات المُقبلة لتوفير إمدادات الطاقة للمجمع الصناعي الخاص بالشركة مما يحقق استراتيجية الشركة لإنتاج أسمدة صديقة للبيئة.
الصفقة الصينية بتعتبر اكبر استثمار اجنبي في مصر بعد صفقة رأس الحكمة واللي هتوصل مجموع استثماراتها مع انتهاء المشروع ل 150 مليار دولار وبتعتبر بداية جديدة لمليارات الدولارات الصينية اللي هتضخ في السوق المصري وبالتالي استمرار التدفقات الدولارية للسوق المصرفي واستقرار سعر الدولار وتكريس صدارة مصر لسوق الاستثمارات الأجنبية في افريقيا.
