تحركات مهمة في بنوك مصر.. يا ترى إيه علاقتها بالدولار؟
فى الأيام اللي فاتت كان فيه تزايد ملحوظ في الإقبال على الادخار بالدولار.. الناس بتشتري شهادات دولارية كأنها بتأمن نفسِها ضد أي تقلبات. طيب ليه الإقبال ده حصل؟ وهل فعلًا الشهادات الدولارية ممكن تبقى الحل لأزمة الدولار اللي بتعاني منها السوق المصرية؟ وإزاي ده ممكن يغير شكل السوق في مصر؟
ارتفاع سعر الدولار مقابل الجنيه خلى ناس كتير تفكر إزاي تحافظ على قيمة مدخراتها.. الفكرة ببساطة إن الشهادات الدولارية مش بس بتحافظ على قيمة الفلوس.. لكن كمان بتديك عائد بالدولار.. وده بالنسبة للكتير يعتبر فرصة خصوصًا مع التوقعات إن أسعار الفائدة على الجنيه ممكن تنخفض قريب.. يعني بدل ما تسيب فلوسك بالجنيه وتقل قيمتها مع الوقت بتحولها لشهادات بالدولار وتستفيد من الفائدة المرتفعة.
البنوك نفسها كمان بتشجع الاتجاه ده لأنها بتحتاج تعزز قاعدتها بالدولار علشان تقدر تواجه متطلبات السوق، سواء في الاستيراد أو تغطية احتياجات العملاء.
زخلينا ندخل شوية في الأرقام… وفقًا للبنك المركزي البنوك المصرية جذبت مدخرات بالدولار بقيمة 6.1 مليار دولار في أول 10 شهور بس من السنة الحالية.. يعني وصل الإجمالي لـ56.6 مليار دولار بنهاية أكتوبر مقارنة بـ50.5 مليار دولار في ديسمبر 2023.. والفرق ده كبير وبيعبر عن مدى التوجه القوي للادخار بالدولار.
البنوك كمان بتتنافس عشان تجذب أكتر.. يعني مثلًا عندك شهادات دولارية بفوايد بتتراوح بين 4% و8.5%.. وكل بنك بيحاول يقدّم ميزة تنافسية سواء في دورية صرف العائد أو الحد الأدنى للاشتراك.
طب إيه تأثير ده على أزمة الدولار؟
خلينا نكون صريحين.. زيادة الإقبال على الشهادات الدولارية بتساعد في تخفيف أزمة شح الدولار.. لأنها بتزود السيولة الدولارية في البنوك.
و السيولة دي بتستخدمها البنوك في تمويل احتياجات السوق زي الاستيراد ودعم المشروعات اللي بتحتاج عملة أجنبية لكن هل ده كفاية.. الحقيقة لا.. لأن أزمة الدولار في مصر أكبر من مجرد زيادة مدخرات ومرتبطة بالاستيراد والإنتاج.
وهل العوائد هتفضل زي ما هي؟
الخبراء بيتوقعوا إن الفوايد على الشهادات الدولارية ممكن تقل مع الوقت خصوصًا لو الفيدرالي خفض الفايدة.. وده هيخلي العوائد أقل جاذبية مقارنة بالفترة الحالية.. مثلًا بنك مصر خفّض الفايدة على شهادات الادخار "القمة" و"إيليت" بالدولار مرتين في فترة قصيرة.
طب اللى بيحصل ده فرصة ولا مخاطرة؟
بص يا سيدي .. لو انت مستثمر بتدور على استقرار في القيمة مع عائد ثابت بالدولار فهي فرصة.. لكن لو بتفكر في استثمار طويل الأجل محتاج تفكر مرتين خصوصًا مع احتمالية انخفاض الفوايد.
واللي لازم تعرفوا ان الشهادات الدولارية تعتبر وسيلة جذابة دلوقتي.. سواء للحفاظ على قيمة المدخرات أو لمساعدة السوق على مواجهة نقص السيولة الدولارية.. لكن مش هي الحل النهائي.. الحل لازم يكون في زيادة الإنتاج وتقليل الاعتماد على الدولار في الاستيراد.. و لحد ما ده يحصل هتفضل الشهادات الدولارية لعبة الكل بيحاول يكسب منها
