مشروعات بـ 15 مليار دولار.. الهيدروجين الأخضر هيحل أزمة الدولار في مصر
يا ترى إيه حكاية الهيدروجين الأخضر اللي فجأة بقى حديث العالم؟ وليه مصر عايزة تستثمر فيه 15 مليار دولار في المرحلة التجريبية؟ يعني إحنا ليه بنصرف كل الفلوس دي على حاجة لسه في بدايتها؟ وإزاي المشروعات دي ممكن تغيّر مستقبلنا الاقتصادي؟ .. في الفيديو ده هنعرف إيه قصة الهيدروجين الأخضر وليه كل الأنظار متجهة ليه وإزاي مصر بتخطط تبقى لاعب عالمي في السوق ده.
في البداية كده الهيدروجين الأخضر مش مجرد اسم شيك لطاقة نظيفة.. ده وقود بيتم إنتاجه من فصل الهيدروجين عن المياه باستخدام طاقة متجددة زي الطاقة الشمسية أو طاقة الرياح.. يعني ببساطة العملية كلها خالية من أي انبعاثات كربونية وده اللي بيخليها "خضراء".. وده مختلف تمامًا عن الهيدروجين اللي بيتم إنتاجه باستخدام الغاز الطبيعي اللي بيسبب انبعاثات ضارة.. ومؤخرا الهيدروجين الأخضر بقا حل عبقري لمشكلة التلوث ومصدر طاقة نظيف وفعال للمستقبل.
طب ليه استثمارات الهيدروجين الأخضر عالية جدًا؟
الحقيقة إن التكنولوجيا المستخدمة لإنتاج الهيدروجين الأخضر مكلفة جدًا حاليًا.. لكن مع تزايد الطلب العالمي عليه التكاليف دي هتقل بمرور الوقت.. كمان، الدول الأوروبية خاصة ألمانيا ومعاها االصين مستعدة تدفع مبالغ ضخمة للحصول على الهيدروجين الأخضر كمصدر طاقة مستدام. .فمصر بتستثمر النهارده علشان تكون مصدر رئيسي للهيدروجين الأخضر في المستقبل.
إزاي مصر بتخطط تحقق 15 مليار دولار؟
مصر مش بتبدأ من الصفر.. إحنا عندنا مميزات كبيرة بتخلينا في موقع ممتاز للسوق ده.. أولها عندنا مصادر طبيعية هائلة للطاقة الشمسية والرياح وده بيخلي تكلفة إنتاج الهيدروجين الأخضر عندنا أقل من دول كتير.. تانى حاجة موقع مصر الاستراتيجي بيخليها قريبة جدًا من أسواق أوروبا اللي بتعتبر أكبر مستهلك مستقبلي للهيدروجين الأخضر.. والمرحلة التجريبية اللي بتستهدف استثمارات بـ15 مليار دولار هتكون بداية لسلسلة مشاريع ضخمة تقدر تستوعب استثمارات أكبر في المستقبل.
وإيه الفوايد اللي هتجنيها مصر؟
فيه فوايد كتير للى بتعملوا مصر فى مشروعات الهيدروجين الأخضر.. منها زيادة الدخل القومي لأن صادرات الهيدروجين الأخضر هتجيب لمصر مليارات الدولارات سنويًا وده هيحسن الاقتصاد.. و المشروعات دي هتخلق آلاف الوظائف الجديدة سواء في مراحل الإنشاء أو التشغيل.. كمان الاعتماد على طاقة نظيفة هيقلل من الانبعاثات الضارة وده هيحسن جودة الهواء والصحة العامة..و لما نبقى من أكبر منتجي الهيدروجين الأخضر هنكون لاعب رئيسي في سوق الطاقة المتجددة العالمي.
بس خلينا نكون واقعيين... الطريق مش مفروش بالورود فيه تحديات زي ارتفاع تكلفة الإنتاج حاليًا وتوفير التمويل اللازم لبناء البنية التحتية المطلوبة.. لكن مع التعاون بين الحكومة والقطاع الخاص ومع وجود استثمارات أجنبية مهتمة مصر عندها فرصة حقيقية علشان تتغلب على التحديات دي.
