عام التحديات الكبرى.. ماذا يحدث لاقتصاد مصر في 2025؟
يا ترى 2025 هتكون سنة الانفراجة لمصر؟ ولا هنشوف الجنيه مستمر في دوامة التراجع؟ طب إيه السيناريو الأقرب تعافي اقتصادي ولا أزمات جديدة؟.. أسئلة كتير بتشغل بال المصريين والمستقبل فعلاً بيبان غامض ومحدش عارف الدنيا رايحة على فين .. بس لو ركزنا شوية هنلاقي إن 2025 ممكن تكون نقطة تحول..بس تحول فين؟ لفوق ولا لتحت؟ تعالوا نشوف التفاصيل
أول حاجة لازم نبص عليها هي الوضع الاقتصادي دلوقتي.. 2024 كانت سنة صعبة جدًا على الاقتصاد المصري التضخم لسه مرتفع والجنيه استمر في الضغط قدام الدولار مع وصوله في السوق الرسمية لفوق ال 51 جنيه ده غير إن الدين الخارجي وصل لمستويات جديدة والتحديات العالمية زي ارتفاع أسعار الفائدة الأمريكية وكمان الحروب الإقليمية زادت من تعقيد المشهد.
لكن مع كل ده، كان فيه محاولات لإنقاذ الموقف.. زي المفاوضات مع صندوق النقد الدولي واللي بدأنا نشوف فيها مرونة أكتر كمان الدولة شغالة على بيع بعض الأصول لجذب استثمارات دولارية.. وكل دي خطوات هدفها تقليل الضغوط.
طب هل التحركات اللي بتحصل دي كفاية أصلا؟
لو بصينا لنص الكوباية المليان هنلاقي إن فيه فرص ممكن تساعد الاقتصاد يتحسن أولها الاستثمارات الخليجية.. دول الخليج عندها اهتمام واضح بالاستثمار في مصر خاصة في قطاعات استراتيجية زي البنوك والطاقة والعقارات.
كمان القطاع السياحي بيسجل أداء قوي جدًا مع زيادة السياح العرب والأجانب.. وده بيضخ دولارات جديدة في السوق بالإضافة ان مصر عندها احتياطيات كبيرة من الغاز الطبيعي ولو تم استغلالها بكفاءة ممكن تبقى مصدر مهم للدخل بالعملة الصعبة.
وكمان فيه كلام عن احتمالية خفض أسعار الفايدة من البنك المركزي في 2025.. و الخطوة دي لو حصلت هتشجع الاستثمار المحلي وتدي فرصة للشركات إنها تتوسع وتخلق فرص عمل جديدة.
بس خلونا نبقى واقعيين... الطريق للتعافي مش سهل واحدة من أكبر العقبات هي أزمة الجنيه طول ما سعر الجنيه مش مستقر المستثمرين هيبقوا مترددين وده معناه إن استثمارات جديدة ممكن ما تدخلش بالسلاسة المطلوبة الا لو استمرت مرونة سعر الصرف اللى البنك المركزي بدأ تطبيقها من مارس اللى فات.
كمان التضخم اللي مش بس بيأثر على مستوى معيشة الناس لكن كمان بيضغط على الشركات الصغيرة والمتوسطة اللي مش عارفة تتعامل مع ارتفاع التكاليف.
ما نقدرش ننسى كمان أزمة الديون.. مع تزايد الدين الخارجي مصر محتاجة تدفع أقساط وفوايد ضخمة في 2025 وده هيضغط على الاحتياطيات الدولية.
طب ايه السيناريو الأقرب انه يحصل فى 2025؟
فيه سيناريو متفائل بيقول إن مصر هتقدر تجذب استثمارات جديدة وتخفض عجز الموازنة وتحقق استقرار لسعر الجنيه لو ده حصل ممكن نشوف بداية تعافي حقيقي في النص التاني من 2025.. لكن السيناريو التاني بيقول إن لو ما فيش تحرك سريع وحاسم الأزمات ممكن تتفاقم .. يعنى التضخم يزيد والجنيه يضعف أكتر والضغط على المواطنين يفضل مستمر.
