الحكومة أخيرا اتحركت.. شوف اللي هيحصل في المناطق الصناعية غير المخططة

يا ترى ليه الحكومة المصرية مهتمة دلوقتي بإعادة تشغيل المصانع المغلقة وتطوير المناطق الصناعية اللي كانت مهملة من سنين، وهل فعلا في خطة جديدة عشان الصناعة ترجعها لمجدها من جديد، طب الخطة دي بتستهدف تطوير كام مصنع، وهتبدأ امته ومن أي محافظة، وكام نسبة الطاقة الإنتاجية اللي متوقع تطلعها المصانع دي والأيام الجاية هيبقي شكلها إيه.. هنقولك كل التفاصيل في الفيديو ده فتابعنا للآخر. 
 

طبعا كلنا عارفين إن الفريق كامل الوزير، وزير الصناعة والنقل، ونائب رئيس الوزراء للتنمية الصناعية، مهتم جدا بملف تطوير الصناعة المصرية، وخاصة إعادة تشغيل المصانع اللي كانت مقفولة من سنين وعفا عليها الزمن، والدليل إن في شركات كانت لها أمجاد تاريخية زي النصر للسيارات ورجعتها الحكومة لدورة العمل من تاني.

والفترة دي، وزير الصناعة ماشي زي القطر في ملف تطوير الصناعة المصرية، وكل يوم يدرس ملف مختلف ويحل مشاكل هنا وهناك ويفتح مصانع ويطور مناطق صناعية تانية، وآخر اللي حصل كان استقباله مستثمرين من محافظة الشرقية، عشان يبحث معاهم المشاكل والمعوقات اللي بتقابلهم، لأنه كل أسبوع يقعد مع مجموعة مستثمرين في محافظة مختلفة.

وفي الساعات الأخيرة تحديدا، الفريق كامل الوزير التقى مستثمرين الشرقية، وبحث معاهم الموقف التنفيذي للمناطق الصناعية بالمحافظة، وبدأ يدرس كل التحديات والعقبات اللي بتواجه المستثمرين الصناعيين عشان يحلها ويذللها والعجلة تمشي.

كمان، وزير الصناعة عملا لقاء مع المهندس حازم الأشمونى محافظ الشرقية، واستعرض الموقف التنفيذي للمناطق الصناعية المعتمدة بمحافظة الشرقية، واللي بتضم 4 مناطق صناعية بإجمالي مساحة 22577 فدان، وبتشمل المناطق دي، المنطقة الصناعية في العاشر من رمضان واللي بتقع على مساحة 20119 فدان، وكمان المنطقة الصناعية بالصالحية الجديدة واللي بتكون على مساحة 683 فدان، ومنطقة بلبيس الصناعية المقامة على مساحة  289.6 فدان، والمنطقة الصناعية ببساتين الإسماعيلية "الزوامل" وبتقع على مساحة 1484.98 فدان، وكمان تم استعراض الموقف الحالي لتخصيص وتشغيل الأراضي الصناعية بكل منطقة، بجانب مناقشة وضع الترفيق ونسب تنفيذها، والموقف التنفيذي للمطورين الصناعيين بمدينة العاشر من رمضان.

ومش بس كده، ده الوزير كمان بحث الموقف التنفيذي لمجمع الصناعات الصغيرة والمتوسطة التابع للجهاز التنفيذي للمشروعات الصناعية والتعدينية، وكذلك المجمعات الصناعية التابعة لوزارة الاسكان ،  وموقف المناطق الصناعية الغير مخططه بالمحافظة، واللي بتشمل منطقة المهندسين العرب، وبتتواجد على مساحة 3318 فدان، ومنطقة أبو عطيان اللي على مساحة 402 فدان، ومنطقة المدينة المنورة اللي مساحتها 1290 فدان، ومنطقة توسعات بلبيس بواقع 263 فدان.

والكلام ده معناه، إن في خطة حكومية ضخمة لتطوير المناطق الصناعية الغير مخططة، واللي هتضم كمان توفير المرافق الخاصة بها بمختلف المحافظات، ومش هيتم  تخصيص أراضي صناعي جديدة إلا في المناطق الصناعية المعتمدة والمخططة واللي تم استكمال مرافقها بالكامل، وطبعا كل ده هدفه التسهيل والتيسير على المستثمرين عشام يقدروا يبنوا ويشتغلوا فورا.