لو عاوز تعرف سعر الدولار بيزيد ليه؟ اعرف الإجابة في هذا التقرير

يا ترى ايه سر ارتفاع الدولار المفاجئ وتخطيه لأول مرة حاجز الـ 50 جنيه ؟ وازاى سعر الدولار بيزيد رغم أن كل المؤشرات بتقول ان فيه وفرة فى العملة الجنبية فى البنوك؟ وايه المتوقع يحصل الأيام الجاية ؟ وايه علاقة كل ده بالمراجعة الرابعة لبرنامج الاصلاح الاقتصادي من صندوق النقد الدولي؟

لازم في الأول كده نعرف حاجة مهمة مش كل حاجة بتحصل في السوق لازم يكون وراها أزمة كبيرة.. الارتفاع الأخير في سعر الدولار مش مجرد صدفة ده جزء من استراتيجية كبيرة لزيادة الاستثمارات الأجنبية في مصر وتقوية وضع البلد المالي

طب إيه سبب الارتفاع ده؟

السبب الحقيقي ورا الارتفاع ده هو السياسة الاقتصادية اللي بتستهدف جذب الاستثمارات الأجنبية المباشرة.. وده من خلال جعل مصر أكتر جذبا للاستثمار في وقت بتواجه فيه مصر تحديات اقتصادية كبيرة.. يعني ببساطة لو الدولار رخص المستثمرين مش هيجيوا علشان العوايد هتبقى أقل لكن لو الدولار ارتفع شوية، العوايد على استثماراتهم في أدوات الدين المصري هتبقى مغرية ليهم أكتر.. والهدف من كده هو إنك تخلي الاستثمارات الأجنبية تفضل في السوق المصري بدل ما تهرب وكمان تجذب استثمارات جديدة.. يعني لو عندك استثمارات خارجية دخلت البلد عشان تحقق عوايد كويسة ده هيساعد في استقرار الاقتصاد بشكل عام حتى لو فيه تحديات مؤقتة زي تذبذب أسعار الصرف

طب نيجي للسؤال المهم هل فيه أزمة في توافر الدولار؟

بالتأكيد لا.. في الفترة الأخيرة الحكومة أكدت فى أكتر من مناسبة إن فيه سيولة دولارية كافية في البنوك لتلبية احتياجات السوق.. و في الحقيقة الحكومة مهتمة إن الأموال الأجنبية تفضل في مصر علشان تدعم الاقتصاد، مش بس من خلال الاستثمارات، لكن كمان من خلال أدوات الدين اللي بتُطرح في السوق

وده مش كلام بس ده مدعوم بكلام رئيس الوزراء الدكتور مصطفى مدبولي اللي أكد إن الحكومة قادرة على توفير الدولار لاستيراد السلع الأساسية وده اللي بيساعد على استقرار السوق الداخلي وعدم وجود أزمة حقيقية في العملة

والهدف من الارتفاع في سعر الدولار مش بس جذب الاستثمارات بس  لكن كمان هو حماية الاقتصاد من هروب الأموال الساخنة اللي هي الأموال اللي بتيجي في فترات معينة وبتخرج بسرعة لو فيه مشاكل أو تذبذب في السوق.. و لما الدولار يرتفع شوية ده بيخلي الاستثمارات الأجنبية في أدوات الدين زي السندات الحكومية مش مجرد حاجة جاذبة لكن كمان بتبقى أمنة أكتر من إنها تخرج بره

واللى بيحصل فى سوق صرف العملات فى اخر كام ساعة مش معناه إن فيه مشكلة في الموارد الدولارية بالعكس البنوك المصرية بتحتفظ بمستوى جيد من الاحتياطيات وبتبذل جهد كبير علشان توازن بين تلبية احتياجات السوق والحفاظ على الموارد.. وفيه إجراءات ثابتة ومعروفة من الحكومة والبنك المركزي علشان يضمنوا الاستقرار الاقتصادي وده مش معناه إن الناس لازم تخاف في النهاية السوق مستقر وفيه إجراءات بتتاخد لحمايته ومافيش داعي للقلق

طب إيه اللي جاي؟

الخبراء متوقعين إن المعركة الاقتصادية هتستمر لكن بما إن الدولار ارتفع بمرونة ومع وجود سياسات واضحة للدولة فالوضع مش مقلق الفكرة كلها في الحفاظ على الاستثمارات الأجنبية وتوجيهها للقطاعات اللي محتاجة الدعم

في النهاية لازم كلنا نكون عارفين ان مفيش حاجة اسمها أزمة في توافر الدولار ولا فيه أزمة كبيرة هتحصل بسبب ارتفاعه.. ده مجرد جزء من خطة طويلة الأجل لجذب الاستثمارات وخلق بيئة اقتصادية مستقرة وكل اللي محتاجين نعرفه هو إن الوضع تحت السيطرة ومفيش حاجة نخاف منها