عمالقة الدنمارك في السوق المصري بعد زيارة السيسي

هو الرئيس السيسي ليه راح زار الدنمارك واشمعنا الدنمارك بالذات اللي بدأ بيها جولته وإيه حكاية الشركات الدنماركية العملاقة اللي هتوسع استثماراتها في مصر.. التفاصيل كلها هتلاقوها في الفيديو دا خليكم معانا للأخر
 

معروف إن رئيس الدولة لما يقرر يزور دولة مش بتكون أي زيارة والسلام لكن بتكون على قدر أهمية المسئول اللي بيتحرك بنفسه ويكون ليها مردود كبير على الدولة المصرية وكل جولات الرئيس السيسي الخارجية بتكون مصلحة مصر هي رقم واحد في اي زيارة واللي بيكون فيها مكاسب اقتصادية كبيرة لمصر بجانب تعميق العلاقات السياسية .
وزي ما احنا عارفين إن الرئيس عبد الفتاح السيسي زار الدنمارك في الساعات الاخيرة ودي أول زيارة لرئيس مصري وعشان نعرف أهميتها الدنمارك دولة من دول الاتحاد الاوربي وفيها شركات عالمية وميزانيتها بمليارات الدولارات وليها استثمارات بالمليارات بردوا في دول العالم ونروح بعيد ليه.. أكيد حضراتكم عارفين شركة ميرسك عملاق الشحن البحري على ضهر الكوكب واللي بتوثصل قيمتها السوقية 193 مليار دولاروتعد من أكبر الشركات العاملة في مجال الحاويات والشحن على مستوى العالم وهي واحدة من عدة شركات ضمن مجموعة شركات ايه بي موللر ميرسك التي تحتوي على مجالات عدة منها ما يرتبط بمجال الحاويات أو المجالات المختلفة الأخرى. 
الرئيس السيسي خلال زيارته للدنمارك اجتمع مع بروبرت ميرسك أوجلا، رئيس مجلس إدارة مجموعة شركة «أيه بي موللر ميرسك» واللي قدم الشكر للرئيس السيسي على الدعم اللي بتقدمه الحكومة المصرية لأعمال الشركة في مصر، وأشاد بالجهود اللي بتقوم بيها مصر لجذب الاستثمارات الأجنبية في مختلف القطاعات، وتذليل أية عقبات أمام الشركات العاملة في مصر وأكد حرص الشركة على تعزيز تعاونها والنظر في زيادة حجم أعمالها في مصر.

الرئيس السيسي من ناحيته ثمن التعاون القائم مع شركة ميرسك وأكد على تقدير مصر للجهود اللي بتقوم بيها الشركة لتطوير بعض محطات الحاويات المصرية بهدف تحويلها إلى محطات عالمية لتداول الحاويات في منطقة شرق وجنوب البحر المتوسط بخلاف مشروعات الشركة لإنتاج وتزويد سفنها بالوقود الأخضر، وبما يساهم في جعل مصر مركز إقليمي لعمليات الشركة، سواء فيما يتعلق بتجارة الحاويات أو إنتاج الوقود النظيف

كمان  الرئيس عبد الفتاح السيسي اجتمع مع فيليب كريستياني، رئيس شركة شركاء كوبنهاجن للبنية التحتية واللي اكد للرئيس السيسي تطلع شركته للتعاون مع مصر وتعزيز استثماراتها في قطاعات الطاقة النظيفة والمستدامة في مصر ودا بسبب الفرص الواعدة بالسوق المصري وإن الشركة مهتمة بالتوسع في إنتاج الطاقة النظيفة والهيدروجين الأخضر بمصر بما فيها مشروع إنتاج الأمونيا الخضراء وناقش الرئيس السيسي مع رئيس الشركة فرص تعزيز استثمارات الشركة في مصر، والمشروعات اللي ممكن تنفيذها في إطار جهود تطوير التعاون بين مصر والشركة.
يعني لما أكبر مسئول في مصر وهو الرئيس السيسي يهتم بمقابلة رؤساء أكبر الشركات الدنماركية والعالمية عشان تستثمر في مصر يبقي أكيد فيه صفقات قريبة في السوق المصري ومش بس كده دا الرئيس السيسي أعلن ترفيع العلاقات بين مصر والدنمارك لمستوى الشراكة الاستراتيجية ودا معناه إن مصر هتكون سوق ذا أولوية سواء للحكومة الدنماركية أو القطاع الخاص والشركات الدنماركية وعشان كده تم في الزيارة تشكيل مجلس الاعمال المصري الدنماركي واللي بيعتبر نقطة انطلاق للكيانات الاقتصادية والتجارية الدنماركية للاطلاع على الامكانيات الاستثمارية المتوفرة بمصر خاصة في قطاعات البنية التحتية والاتصالات وتكنولوجيا المعلومات وإنتاج الطاقة الخضراء بما يدعم جهود الدولة المصرية لكي تكون مركز إقليمي لسلاسل الامداد ونقل وتداول الطاقة المتجددة والخضراء.