الدولار الأميركي يعزز مكاسبه أمام اليورو والين.. صمود للجنيه المصري

اليورو ينخفض 0.3% ليصل إلى 1.0561 دولار، والدولار يُنهي الأسبوع بزيادة 0.2% أمام الين.

الأنظار تتجه لتقرير التضخم الأسبوع المقبل، الذي قد يحسم توقعات خفض الفائدة هذا الشهر، بينما يرى محللون فرصة شراء الدولار في 2025.

يا ترى الدولار رايح على فين بعد ما سجل 50 جنيه في البنوك الخمس في اخر تعاملات الأسبوع، وهل هو متوفر في البنوك المصرية، والدولة قادرة على الوفاء بالتزاماتها من العملة الخضراء، وسعره هيوصل كام بكرة.. وإيه المتوقع لسعره خلال الفترة الجاية.. هنقولك كل التفاصيل في التقرير  ده فتابعنا للآخر.

في الأيام الأخيرة، استقر سعر الصرف الدولار في مصر قدام الجنيه، وده حصل في ظل استمرار العمل بسعر الصرف المرن اللي اتبنته الدولة المصرية توافقا مع السياسات العالمية، وكل ده بيجي ضمن مسيرة الإصلاح الاقتصادي اللي بتنتهجها الدولة من سنين، وساهم بالفعل في حدوث طفرة من النمو بشهادة المؤسسات الدولية.

وفي آخر تعاملات البنوك الخميس أعلن البنك المركزي المصري، إن سعر الدولار سجل 49.94 جنيه للشراء و50.07 جنيه للبيع، وده دليل قوي بيؤكد إن العملة الأمريكية بتتحرك وفقا لسياسة مرنة في مصر وبدون تدخل حكومي اطلاقا

عشان كده سعر الدولار في البنوك العاملة في مصر، بيتحدد قدام الجنيه المصري وفقا للعرض والطلب، وحاليا في استقرار نسبي نتيجة وفرة النقد الأجنبي، وأغلب السلع الاستراتيجية متوفرة بالسوق المحلي، وكمان مافيش أي شكاوى من المستوردين لما يجوا يطلبوا الدولار من البنوك.

كمان، الدولة المصرية قادرة على السداد والوفاء بالتزاماتها، والبنوك المصرية عندها وفرة في العملة الصعبة اللي بيحتاجها المستوردين، وسعر الدولار كل يوم في حالة مرونة.

ونقدر نقول، إن البنوك المصرية نجحت في الفترة الأخيرة في توفير الدولار بكثرة، وده بيؤكد على نجاح السياسات النقدية والمالية للبلاد وقدرتها على توفير النقد الأجنبي، وأن عندنا رصيد كويس جدا من الأصول والعملة الدولارية.

وبالنسبة الارتفاع التدريجي في احتياطي النقدي الأجنبي اللي أعلن عنه البنك المركزي المصري بشكل دوري، فده بسبب مواصلة التدفقات الأجنبية من تحويلات المصريين بالخارج والتصدير اللي بتستهدفه الدولة في المقام الأول، وكمان بتسعى دلوقتي لتوطين التصنيع عشان تزود التصدير وتجذب للمزيد من الاستثمارات الأجنبية المباشرة، وده على الرغم من وجود تحديات كبيرة نتيجة الأوضاع الإقليمية واللي لا تخفى على أحد، وأثرت بشكل كبير على موارد دولارية هامة.

ونقدر نقول إن اللي بيحصل للدولار  هو أمر متوقع بعد التصريحات الاخيرة لرئيس الوزراء فيما يتعلق بمرونه اسعار الصرف، يعني بيرتفع وبينخفض وفقا للعرض والطلب، والسعر مش ثابت عند رقم محدد زي قبل كده يعني بكرة محدش يعرف سعر الدولار كام لان السوق هو اللي هيحدد السعر واللي يقولك غير كده يبقي بيضحك عليك.. يعني الدولار ممكن ينزل... ايوا طبعا ممكن ينزل حسب الطلب عليه..

طب بالنسبة للكلام المنتشر بخصوص حدوث تعويم جديد للجنيه المصري، فهل ده حقيقي؟

بص يا سيدي، كل الكلام اللي بيتقال عن حدوث تعويم جديد، أو تحرير لأسعار الصرف، خلال الفترة الجاية، مش حقيقي، خاصة إن أسعار الصرف دلوقتي بتتمتع بمرونة كبيرة في السوق، وكمان في توافر للدولار في البنوك كل يوم، والمعاملات اليومية بتؤكد الكلام ده، يعني الخلاصة مافيش حاجة أصلا تستدعى تحرير جديد لأسعار الصرف أو تعويم للجنيه.

عشان كده، متوقع خلال الأيام الجاية انخفاض أسعار الدولار وفقا لسياسية العرض والطلب ووسط وجود مرونة في أسعار الصرف.