لو معاك فيزا مشتريات يبقى خلي بالك.. وسواس في جيبك
لو معاك فيزا مشتريات يبقي لازم تاخذ بالك من كام حاجة لان فيزا المشتريات ممكن تفلسك وتخليك مديون للبنك، وتفضل محاصر ومطارد من الديون الكتيرة اللي هتتراكم عليك.. لو عايز تعرف ده بيكون أزاي واية اسبابه شوف التقرير ده للآخر.
فيزا المشتريات واحدة من الخدمات اللي بتقدمها البنوك للعملاء، وفيزا المشتريات دي نوع من بطاقات الائتمان المصرفية اللي بتمنح حاملها القدرة على إجراء عمليات الشراء والدفع من المحلات التجارية ومن خلال الإنترنت والنوع ده من البطاقات بيكون مرتبطة بحساب مصرفي أو حد ائتماني وبتكون مصدر الأموال اللي بيستخدمها العملاء للشراء من البنك اللي اصدر الفيزا.
طيب ايه مميزات فيزا المشتريات اللي بتقدمها البنوك؟
فيزا المشتريات بتقدم مميزات كبيرة جدا لعملاء البنوك، واول المميزات دي هيا سهولة الاستخدام، خصوصا إن العميل يقدر من خلالها يدفع كل معاملاته التجارية من الإنترنت بكل سهولة، وكمان بتدي للعميل أريحية في الدفع وبيكون مش لازم يشيل فلوس نقدية في جيبه، وبتوفر سجل للمعاملات، ويقدر بيها العميل يعرف هو صرف أد اية ومعاه اد اية بكل سهولة بدون ما يتوه في المصاريف والمعاملات الحسابية.
فيزا المشتريات كمان بتوفر للعميل الأمان خصوصا أن أي معاملة بتكون علي الكارت لازم العميل يدخل فيها رمز التحقق السري وده بيحمي العميل من الاحتيال والاستخدام غير المصرح بيه، وكمان في عدد كبير من البنوك بتقدم عروض وتحفيضات علي فيز المشتريات، ده غير أن العميل يقدر يجمع نقط وياخذ بيهم خصومات وعروض خاصة وقت الشراء.
طيب اية هيا مخاطر فيز المشتريات وازاي العميل يتجنب العيوب دي؟
زي ما فيزا المشتريات لها مميزات كتيرة برضوا عليها عيوب كتيرة أول العيوب دي هيا الديون وفي حالة لو العميل مسددش الرصيد اللي استخدمه من البطاقة قبل تاريخ استحقاق الدفع ففي الحالة دي هيتم تطبيق فوائد على المبلغ اللي استدان بيه، وممكن المبلغ يتراكم ويتحول لرقم كبير.
تاني عيوب فيزا المشتريات هيا الرسوم والفوائد خصوصا أن البنوك بتفرض رسوم سنوية على البطاقة، ده غير فوايد الاستخدام في حالة عدم سداد الرصيد قبل التاريخ المحدد.
تالت مشكلة فيزا المشتريات هيا أنها بتغري العميل علي الشراء الكتير خصوصا أنها بتوفر علي العميل الصرف بكل سهولة وبدون ما يكون شايل هم الفلوس اللي موجودة في جيبه، ولا خايف عليها من السرقة، واحيانا كتيرة بعض العملاء وبسبب انهم معاهم سحب بيشتري بكميات كبيرة،ظ وعلشان كده الخبراء اكدوا علي ضرورة أن العميل يكون عارف كل حاجة عن فيزا المشتريات قبل ما يقدم طلب عليها وكمان يكون متأكد أنه عنده قدرة على سداد المبالغ المستدانة في المواعيد المحددة علشان يتجنب المشاكل المالية المحتملة.
