استثمارات بـ 28 مليار دولار.. حصيلة زيارة مدبولي التانية للسعودية
مصر حاليا مشاركة في قمة مهمة جدا في العاصمة السعودية الرياض والقمة دي هتكون لها عوايد اقتصادية كبيرة علي مصر.. يا تري اية هيا القمة دي واية هيا العوائد اللي هترجع علي مصر من المشاركة فيها
من ساعات الدكتور مصطفى مدبولي رئيس مجلس الوزراء سافر الي العاصمة السعودية الرياض نيابة عن الرئيس عبدالفتاح السيسي علي رأس وفد اقتصادي مصر للمشاركة في قمة الاستثمار اللي بتنعقد في الرياض في الفترة من 29 إلى 31 اكتوبر الحالي واللي هتيم فيها الاعلان عن صفقات دولية بقيمة 28 مليار دولار ودي المرة التانية اللي مدبولي يزور السعودية في فترة وجيزة.
طيب ليه مصر بتشارك في القمة دي بالوفد الحكومي ده ؟.
من فترات طويلة ومصر ليها علاقات اقتصاديه كبيرة مع السعودية والعلاقات دي اتطورت بشكل كبير في الفترة اللي فاتت، وده بسبب العلاقات السياسية والإستراتيجية اللي بين مصر و المملكة العربية السعودية والتوافق السياسي اللي موجودة دلوقتي بين القيادة السياسية في البلدين.
وزي ما احنا عارفين أن مصر في اليومين اللي فاتوا وقعوا أكثر من اتفاقية مختلقة وده تزامن مع زيارة الأمير محمد بن سلمان للقاهرة واللي استقبله فيها الرئيس عبدالفتاح السيسي، واللي تم فيها التوافق فيها في كل المجالات بين البلدين.
طيب العلاقات الاقتصادية بين مصر والسعودية وصلت لفين ؟.
العلاقات السعودية المصرية في الفترة اللي فاتت شهدت محطات مهمة جدا وكان أبرزها توقيع صفقات بقيمة 30 مليار دولار، واستثمارات القطاع الخاص السعودي في مصر وصلت ل 35 مليار دولار لحد شهر نوفمبر 2023.
مش كده بس لا ده كمان صندوق السعودي للتنمية قدم 32 قرضاً لمصر بقيمة تقارب 3 مليارات دولار لتمويل مشاريع في قطاعات مختلفة، والسعودية دعمت الاقتصاد المصري من خلال تقديم ودائع للبنك المركزي المصري بقيمة 10.3 مليار دولار.
وعلي المستوي التجاري، فالسعودية بتعد تاني أكبر شريك تجاري لمصر، ووصل حجم التبادل التجاري بين السعودية ومصر ل 12.8 مليار دولار في 2023.
ووفقا لبيانات اتحاد الغرف التجارية السعودي، فحجم التبادل التجاري بين المملكة ومصر، وصل ل 48 مليار ريال، وقيمة الواردات السعودية من مصر بتوصل ل 20 مليار ريال، والصادرات السعودية إلى مصر بتوصل ل 28 مليار ريال، ومصر بتعتبر هيا الشريك التجاري السابع للمملكة، وحجم الاستثمارات السعودية في مصر بتوصل ل 127 مليار ريال، وكمان في 805 شركة سعودية لها اعمال في مصر، وحجم الاستثمارات المصرية في السعودية بتوصل ل18.7 مليار ريال، ده غير وجود 6830 شركة مصرية شغالين في مجالات مختلفة بالسعودية.
