رقم يخض بجد.. شوف المصريين اشتروا دهب بكام في 3 شهور
ليه المصريين بيشتروا دهب بكميات ضخمة جدا؟ وازاى رغم ارتفاع اسعار المعدن النفيس ناس كتير بتخزن دهب؟ وهل اللى بيحصل ليه علاقة بتراجع قيمة الجنية وارتفاع سعر الدولار؟
رغم إن الأسعار مش قليلة ومعدلات التضخم بتأثر على القدرة الشرائية بس الأرقام بتقول إن مشتريات المصريين من الدهب لسه مستمرة ووصلت لـ 10.4 طن في الربع التالت من 2024 حسب آخر تقرير لمجلس الذهب العالمي.. بس رغم الاقبال الملحوظ الا أنه أقل من مستويات 2023
حد ممكن يسأل ويقول .. إزاي الإقبال على الدهب قلّ مقارنة بالسنة اللي فاتت؟
التقرير بيقول إن رغم الإقبال ده مشتريات المصريين انخفضت بنسبة 17% عن نفس الفترة في 2023.. اللي كانت عند 12.6 طن دهب.. كمان الأرقام بتوضح إن المصريين قللوا مشترياتهم بنسبة 38.5% مقارنة بالربع التانى من السنة اللى فاتت اللي سجل وقتها 14.4 طن.. يعني رغم الإقبال الكبير فيه تراجع ملحوظ عن السنة اللي فاتت والفترة اللي فاتت من السنة دي.
طب ليه المصريين بيشتروا دهب في ظل الأسعار العالية؟
الدهب دايمًا كان ملاذ آمن بالنسبة للمصريين خصوصا في أوقات عدم استقرار الاقتصاد.. والتحليل الفني لمؤسسة جولد بيليون بيقول إن سبب الإقبال على الدهب سببه خوف المصريين من تراجع قيمة الجنيه من جديد خاصة مع توقعات تقلبات في سعر الصرف رغم إن سعر الجنيه مستقر بشكل كبير بعد خطة الإنقاذ من صندوق النقد الدولي اللي بدأت في مارس
لكن دلوقتي المصريين بيدوروا على استثمارات تقدر تحافظ على قيمة فلوسهم فاختاروا الدهب رغم ارتفاع أسعاره بس اللي يهمنا هنا هو إنهم ما بيشتروش مشغولات دهب وبس لأ كمان فيه إقبال على السبائك والعملات الدهبية كأداة للتحوط وحفظ القيمة وده واضح في الأرقام اللي بتقول إن مشتريات السبائك والعملات كانت 5.3 طن في الربع التالت من 2024.
طب هل السعر عامل مؤثر؟
رغم إن السعر ارتفع إلا إن فكرة الدهب كاستثمار آمن لسه جاذبة للمصريين خصوصا اللي عايزين يحافظوا على قيمة أموالهم بعيدا عن تقلبات السوق.. ومع إن التحليل بيقول إن استقرار سعر الصرف خفف شوية من حدة الإقبال إلا إن فكرة الدهب كملاذ آمن لسه قوية لكن مع ارتفاع أسعاره كتير من الناس بقوا يشتروا كميات أقل من المعتاد وده اللي يفسر تراجع الطلب مقارنة بالربع اللي فات.
وايه تأثير التغيرات العالمية على سوق الصاغة فى مصر؟
الحقيقة إن سوق الدهب مش بيتأثر بس بالعوامل المحلية لكن كمان بالمتغيرات العالمية.. التوترات في الأسواق العالمية ورفع أسعار الفايدة في أمريكا مثلا.. بيأثروا بشكل كبير على أسعار الدهب… المصريين بقوا واعيين لأهمية الاستثمار في الدهب في ظل الأزمات لكن بقى فيه نوع من الحذر إنهم ما يندفعوش في الشراء بكميات ضخمة في وقت الأسعار فيه مرتفعة.
الخلاصة .. لو بتفكر تشتري دهب دلوقتي نصيحة الخبراء دايمًا بتقول اشتري بحذر لأن رغم أهمية الدهب كاستثمار طويل الأجل لازم تراقب حركة السوق كويس وخصوصًا لو الأسعار رجعت للارتفاع بشكل ملحوظ.
