إيه اللي هيحصل في مصر يوم 2 نوفمبر؟ .. لقاء مصيري كل الناس مستنياه

يا ترى ايه اللى هيحصل فى مصر يوم2نوفمبر ؟ وايه اللقاء المصيرى اللى كل الناس مستنية تعرف نتايجه؟ ومين المسئول الدولي الكبير اللى هيوصل القاهرة فى اليوم ده ؟ وايه الملفات المتوقع مناقشتها معاه ؟

من كام يوم الرئيس عبدالفتاح السيسي  اتكلم بوضوح عن المشاكل اللى اتسبب فيها تطبيق شروط صندوق النقد وقال ان لوده هيمثل عبء على حياة الناس لازم نراجع الاتفاق مع مسئولى الصندوق وبعدها طلعت مديرة الصندوق كريستينا جورجيفا وأعلنت انها هتزورمصر خلال 10 ايام لمناقشة البرنامج مع الحكومة المصرية.. ووفقا لمصادرمطلعة الزيارة دي هتتم يوم 2 نوفمبر الجاي

فهل الزيارة هتكون مجرد زيارة عابرة ولا وراها ملفات ومناقشات هيكون ليها تأثير كبير على حياة المصريين؟ وليه أصلا الرئيس السيسي أشار بوضوح إنه لو في أي أعباء أو تأثيرات سلبية على الشعب من برنامج الصندوق لازم يتراجعوا عنها؟ وهل ممكن نسمع عن قرارات جديدة بخصوص التمويل أو برامج الإصلاح؟

خلينا نبدأ وندي حضرتك خلفية عن التفاصيل اللي كلنا في انتظارها

أول حاجة ليه مديرة صندوق النقد جايّة مصر؟

في ظل الأزمة الاقتصادية العالمية وبالنظر للوضع الاقتصادي المصري الزيارة دي تعتبر فرصة كبيرة للحكومة المصرية إنها تناقش سبل تطوير برنامج التمويل مع الصندوق.. وبما إن مصر بتمشي بخطوات ثابتة في برامج الإصلاح الاقتصادي الوضع الحالي بيحتم إنه يكون في مراجعة شاملة لشروط الصندوق خصوصًا بعد تصريحات السيسي اللي قال فيها بوضوح إنه مش هيقبل أي ضغوط ممكن تؤثر على المصريين

الرئيس السيسي شدد فى كلامه على أهمية توجيه البرنامج بشكل يحقق التوازن بين الإصلاح وحماية المواطن من الأعباء الاقتصادية

وإيه هي الملفات اللي هتكون على طاولة النقاش؟

أول ملف هيتم مناقشته الديون وأسعار الفائدة.. مصر حاليًا عندها تحديات كبيرة مع الديون الخارجية والفوايد اللي بترتفع على القروض.. والنقاش هيكون حوالين إزاي الصندوق ممكن يساعد في إعادة هيكلة بعض الديون أو حتى تخفيف أعباء الفوائد عشان نقدر نحقق استقرار أكتر

تانى ملف هو سعر الجنيه.. سعر الجنيه مقابل الدولار بقى من المواضيع الحساسة جدًا.. والحكومة عايزة تتجنب مزيد من الضغط على الجنيه وده هيكون ملف مهم جدًا في المفاوضات وهنشوف إذا كانت الحكومة والصندوق هيقدروا يتفقوا على سياسات تدعم استقرار العملة المحلية وتحد من التضخم اللي المصريين بيعانوا منه

كمان التوسع في الصناعة والزراعة.. الرئيس السيسي دايمًا بيتكلم عن أهمية الاعتماد على الصناعة والزراعة كمجالات أساسية لدعم الاقتصاد والملف ده هيكون له دور كبير في النقاش وهل الصندوق هيشجع سياسات تدعم التوسع في القطاعات دي بحيث تقدر مصر تعتمد على نفسها في الإنتاج وتقلل الاستيراد.. بالاضافة لملف برامج الدعم والحماية الاجتماعية اللى بيعتبر من أهم الملفات لأن الحكومة عايزة تضمن إن برامج الصندوق ما تأثرش سلبًا على الدعم المقدم للفئات الضعيفة.. وهنا ممكن الصندوق يشوف إزاي يدعم برامج الحماية الاجتماعية بشكل يخفف العبء عن المصريين الأكثر احتياجًا

الحكومة والصندوق هيبحثوا كمان طرق تشجيع المستثمرين الأجانب على ضخ استثمارات جديدة وده ممكن يشمل تقديم تسهيلات أكتر وبيئة استثمارية أفضل تساعد على جذب الاستثمارات الأجنبية المباشرة

طب هل الزيارة دي هيكون ليها تأثير على تحسين حياة الناس فى مصر ؟

القرارات اللي ممكن تنتج عن الاجتماع ده هتنعكس بشكل مباشر أو غير مباشر على حياة المواطن..و لو حصل اتفاق على تسهيلات جديدة أو تخفيف في الأعباء المالية ده هيساعد الحكومة تدي دعم أكتر للمشاريع المحلية وتوفر فرص عمل أكتر.. بس في نفس الوقت لو حصلت ضغوط من الصندوق بزيادة الضرائب أو تقليل الدعم هنا ممكن يكون في تحديات جديدة للمواطن

الأكيدان زيارة مديرة صندوق النقد الدولي لمصر مش مجرد حدث عادي..هو فرصة مهمة جدًا لمصر إنها توصل صوتها وتوضح احتياجاتها بدون ما يتحمل الشعب أي ضغوط إضافية.

بس يا ترى هل هنشوف تنازلات من الصندوق لدعم مصر بشكل مختلف؟ وهل هيكون في تغيير حقيقي في برنامج الإصلاح عشان يناسب ظروف المصريين؟.. خلونا نستنى ليوم2نوفمبرونشوف إيه اللي هيحصل