قبل الجمعة البيضا.. شوف أفضل طريقة عشان تقلل فاتورة احتياجاتك الشهرية للنص

يا ترى هل في أسر تقدر تخفض احتياجاتها الشهرية من استهلاك، سواء من المواد الغذائية أو السلع الاستراتيجية اللي مايستغناش عنها أي بيت، وامته ممكن يحصل ده، وازاي تقدر الأسرة تحقق المعادلة الصعبة دي، هنقولك كل التفاصيل في الفيديو ده فتابعنا للآخر. 
 

بعد أسابيع، هتبدأ مرحلة العروض الكبرى على السلع والمنتجات سواء من الشركات المحلية أو الشركات العالمية، لأن الوقت ده من كل سنة وتحديدًا في شهر نوفمبر، فهو موعد عروض "البلاك فرايدي" أو الجمعة البيضا زي ما بتقول عليها في مصر، وهنا بتوصل نسبة التخفيضات ل 70%، وحضرتك تقدر تصطاد العروض وتوفر فاتورة احتياجاتهم للنص.

طب ايه هي مزايا الجمعة البيضا؟

أول حاجة، إنها بتعتبر فرصة للتاجر والمستهلك لأن بتحصل حالة رواج اقتصادي فيها، وبيبقي في عروض ممتازة في السوق المصري، لأن المنتِج بيحاول يتخلص من البضائع المتقادمة عنده، وده بيدفعه لانه يعمل عروض عليها واللي ممكن توصل للنص وأكتر من كده في بعض الأحيان بتوصل ل 70%، وطبعا الخصومات دب بتعتبر محفز كبير للمستهلك عشان يشتري كل احتياجاته.

عشان كده، هنقدملك شوية نصائح وأنت بتشتري من عروض الجمعة البيضا، واللي أولها إن حضرتك تروح على المنصات الإلكترونية والمتاجر الموثوقة اللي بتقدم عروض حقيقية، يعني مش أي حد وخلاص، وكمان حاول تتجنب الإعلانات الوهمية والمضللة أو اللي بيتقال عليها العروض الوهمية.

ولو عجبك منتج وعايز تشتريه، ماتنساش تاخد الفاتورة بعد الشراء عشان تضمن حقك في حالة إنك عايز ترجعه، أو في حالة وجود أي عيب في المنتج بعد ما اشتريه، وإياك تندفع لشراء أول شيء تقابله من غير ما تتأكد أن السعر مناسب لك.

كمان لازم تشتري المنتجات اللي بتتماشى مع احتياجاتك، وتتأكد كويس جدا من جدية التخفيضات والعروض وأنت بتشتري.

أخيرا، ميعاد الجمعة البيضا، فهيكون  يوم الجمعة 29 نوفمبر الجاي، وده ميعاد عالمي مش في مصر بس، وبيكون الجمعة الأخيرة من شهر نوفمبر كل سنة، واتسمت بالبلاك فرايدي، لأنها ارتبطت بحدث مهم في القرن ال 19، كان حصل أزمة مالية سنة 1869 في الولايات المتحدة، وفي الوقت ده اتأثر الاقتصاد الأمريكي، فوقفت حركة البيع والشراء وتراكمت البضايع، وحصلت كارثة اقتصادية للبلد؛ وده دفع الشركات لعمل تخفيضات كبيير على السلع والمنتجات عشان تبيع وتقليل خسايرها، ومن ساعتها وهي أصبحت عادة سنوية في آخر جمعة من شهر نوفمبر .

أما عندنا في مصر، فبنسميها الجمعة البيضا لأن الجمعة يوم مقدس، بننزل فيه نصلي الجمعة في الجوامع وأغلبنا بيخصصه للعبادة وقراءة القرآن، عشان كده ماينفعش نقول عليه غير الجمعة البيضا.

وأخيرا، لو لسه محتاج طريقة عشان تقلل فاتورة احتياجاتك الشهرية للنص خاصة في شهر نوفمبر، فراقب كويس عروض الجمعة البيضا واصطاد الفرص براحتك.