بـ140 مليون دولار سنويا.. شوف أسباب منع تصنيع ورق الفويل محليا
الرئيس عبدالفتاح السيسي خلا افتتاحه لمحطة قطارت الصعيد اتكلم عن ارقام تخض لحاجات المصريين استوردوها في 2024، وكلها سلع ينفع بكل سهولة الناس تستغني عنها أو تستبدلها بسلع محلية، منهم ورق الفويل.. يا تري ليه مصر مش بتصنع ورق الفويل.. وهل في اسرار ورا الموضوع ده.. تعالوا نشوف إيه الحكاية
من كام يوم الرئيس عبدالفتاح السيسي افتتح محطة قطارات الصعيد في بشتيل، واتكلم عن الحالة الاقتصادية في مصر ومعدل توافر الدولار في البنوك الوطنية، واتكلم كمان عن السلع اللي الدولة استوردتها في الفترة اللي فاتت واللي للاسف اكدت أد اية الشعب المصري بيصرف ارقام كبيرة بالدولار علي حاجات من السهل قوي استبدالها بمنتجات محلية، والرئيس سماها سلع استفزازية ووجه وزير النقل والصناعة ببحث انشاء مصانع محلية لتصنيع النوع ده من السلع خصوصا أنها هتوفر لمصر أرقام ضخمة من الدولار وكمان هنوصل في وقت من الأوقات أننا نصدر المنتجات دي للدول وده معناهت أننا هندخل مورد أجنبي جديد لمصر من تصدير سلع كنا في الاساس بنستوردها.
واحد من الحاجات اللي اتكلم عليها الرئيس السيسي هيا ورق الفويل واللي مصر استوردت منه بـ 512 مليون دولار في العشر سنين اللي فاتوا، وبتوصل القيمة اللي الدولة محتاجها لاستيراد ورق الفويل سنويا لـ140 مليون دولار سنويا وفقا لتصريحات الفريق كامل الوزير وزير النقل والصناعة.
طيب ليه مصر مش بتصنع ورق الفويل ده محليا خصوصا أنه صناعة سهلة ومش محتاجة تكلفة كبيرة ؟.
لحد فترة قريبة كانت مصر بصدد بدء انتاج ورق الفويل، وتحديدا الشركة القابضة للصناعات المعدنية في مصر واللي كان عندها مشروع في 2018 لتصنيع الفويل جوا مصانع شركة مصر للألومنيوم بنجع حمادي، وكانت الدراسة بتقوم علي تصنيع 60 ألف طن ورق فويل محلي، ولكن للاسف المشروع ده فشل بسبب الكهرباء خصوصا أنه النوع ده من الصناعات بيقوم علي الكهرباء بشكل خاص، خصوصا ان اسعار الكهرباء في مصر تضاعف مرات المرات، ومفيش مستثمر هيدخل بلد يبني مصنع لانتاج ورق الفويل في بلد واللي هيا اصلا صناعة قايمة علي الكهرباء بشكل خاص، وكل فترة الدولة بترفع عليه اسعار الكهرباء، وبالتالي هيجي عليه وقت من الأوقات والمصنع يقف اساسا، علشان كده مفيش مستثمر بيدخل في مصر علشان يعمل مصنع لانتاج النوع ده الصناعة.
طيب مفيش اي شركة بتفكر تصنع ورق الفويل محليا؟.
شركة مصر للألومنيوم التابعة لقطاع الأعمال العام حاليا شغالة علي إعداد دراسة جدوى لمشروع جديد لإنتاج ورق الفويل محلياً، وفعلا الشركة بدأت مشاورات ومناقشات جادة مع أحد الشركات الألمانية لتوفير الاستثمار والتمويل لمشروع إنتاج رقائق الألومنيوم الفويل بتكلفة تقديرية هتوصل لـ 100 مليون دولار علشان الدولة تقضي علي بند مهم من الحاجات اللي بتستوردها مصر من الخارج بارقام ضخمة وطبعا بتكون بالدولار
