وصلت لـ 45.7 مليار دولار.. الحكومة هتعمل ايه عشان توقف استيراد السلع الاستفزازية
سمعنا كلام كتير عن حاجة السلع الاستفزازية والرقم اللي مصر دفعته الدولة و المستوردين لاستيراد النوع ده من السلع يخض.. يا تري هيا السلع دي وآية هيا خطط مصر لوقف استيراد النوع ده من السلع.. خليكم معانا للآخر وهنعرف التفاصيل في الفيديو ده
مصر علي مدار سنين طويله وهيا بتستورد منتجات كتيرة من برا ونسبة كبيرة من احتياجات السوق المحلي مصر بتجيبها من الخارج وطبعا الفاتورة بتكون بالدولار، وجه الوقت ان الدولة تحاول تقفل الحتة دي شوية خصوصا أن الفاتورة اللي بتدفعها مصر في حاجات ممكن أننا نستغني عنها.. كمان في بديل منها محلي وبجودة عالية كمان .
وعلشان تفهم الموضوع لازم نعرف أن مصر بتعتبر من أكبر الدولة المستهلكة واللي بتستورد حاجات وسلع كتيرة جدا من الخارج وعلشان كده الفاتورة الاستيرادية بتاعتنا بتكون مرتفعة، وقربت في وقت من الأوقات من ال100 مليار دولار وفي الوقت الحالي الدولة عايزة بكل الطرق تقلل فاتورة الاستيراد دي خصوصا أن بيستنزف الموارد الدولارية للدولة المصرية، في سلع سماها المتخصصين في الاقتصاد بالسلع الاستفزازية.
طيب اية هيا السلع الاستفزازية اية طبيعتها ؟.
فاتورة الاستيراد المصرية من الخارج بتتضمن خامات كتيرة جدا منها الشكولاتة والعطور والاكسسوارات وأدوات التجميل والسيراميك ومنتجات الألبان والجبن بأنواعها دي غير حاجات تانية كتيرة.
الرئيس عبدالفتاح السيسي اتكلم عن السلع الاستفزازية والارقام اللي مصر يستورد بيها السلع وقال إن مصر استوردت ب 9 مليار دولار قطع غيار موبايل، ده غير استيراد العطور ومزيلات العرق وماء التواليت واللي وصل إجمالي فاتورة الاستيراد ل 440 مليون دولار، ومستحضرات تجميل ب500 مليون وحقائب يد ب 200 مليون، وشيكولاته 400 مليون دولار، ده غير السيراميك، ورق الفويل بـ 500 مليون دولار .
الرئيس السيسي اتكلم كمان وقال إننا بتستورد جبنة بمليار و200 مليون دولار، ده غير العربيات وقطع غيارها واللي وصل فاتورة الاستيراد بتاعتها ل 25 مليار دولار .
الرئيس طالب الفريق مهندس كامل الوزير بضرورة العمل علي فتح مصانع جديدة لإنتاج الحاجات اللي الشعب محتاجها دي ولازم يكون في عندنا دعم وتشجيع للمنتج المحلي، خصوصا أن النوع ده من المنتجات هيفتح فرص فرص عمل للشباب وكمان هيقلل فاتورة مصر الاستيرادية من الدولار وفي نفس الوقت هيزود فاتورة مصر من التصدير وده هيعيد توازن الميزان التجاري لمصر واللي أصبح في الفترات الأخيرة مايل في اتجاه الاستيراد .
طيب مصر بتعمل اية علشان تقلل فاتورة الاستيراد من كل السلع والحاجات اللي مصر بتستوردها من الخارج ؟.
الفريق كامل الوزير، وزير الصناعة والنقل ونائب رئيس مجلس الوزراء للتنمية الصناعية، قال إن الدولة في الفترة الحالية بدأت في إنشاء 6 مصانع للفلنكات مملوكة لشركات وطنية مصرية، منها 4 مصانع مخصصة للقطار الكهربائي السريع بسبب اختلاف مواصفاته عن باقي الشبكة خصوصا أن مصر استوردت وحدات متحركة بقيمة 2.6 مليار دولار في الفترة اللي فاتت ومع إنشاء المصانع الجديدة هيتم التوقف عن استيراد النوع ده من المنتجات تماماً.
الفريق كامل الوزير أتكلم كمان وقال إن مصر شغالة وبكل قوة علشان توقف استيراد أنواع كتيرة من السلع الاستفزازية، وهيكون البديل بتاعها منتج محلي خصوصا أن فاتورة الاستيراد من النوع ده من السلع وصل ل 45.7 مليار دولار، منها العربيات والجرارات وألاتوبيسات، ده غير 8.7 مليار دولار للتليفونات المحمولة، و5.6 مليار دولار لأشياء متنوعة زي الألبان، والأثاث الفاخر والأواني الخزفية.
