قرار عاجل من صندوق النقد بخصوص مصر

صندوق النقد الدولي خدت خطوة مهمة النهاردة بخصوص الدول اللي بتستلف منه.. ولأن مصر تاني أهم زبون عند الصندوق فأي قرار بيهمها.. إيه اللي حصل .. تعالو نشوف مع بعض

من شوية  المجلس التنفيذي لصندوق النقد الدولي وافق في مراجعته لسياسة رسوم القروض على حزمة من الإجراءات بتشمل خفض تكاليف اقتراض أعضائه بنسبة 36%، أو حوالي 1.2 مليار دولار سنويا.

كريستالينا جورجييفا المديرة العامة لصندوق النقد الولي قالت  إن الإجراءات الجديدة هتساهم في خفض تكاليف اقتراض أعضاء صندوق النقد الدولي وإن عدد الدول الخاضعة للرسوم الإضافية في السنة المالية 2026 هينحفض من 20 إلى 13 دولة.
وعشان تبقي عارفين رسوم القروض الإضافية دي بتطبق على الدول اللي بتقترض أكتر من حصتها المخصصة، أو القروض اللي أجلها طويل في السداد وإن الصندوق اعتمد حزمة شاملة لتقليل تكلفة الاقتراض مع الحفاظ على القدرة المالية لصندوق النقد الدولي لدعم البلدان المحتاجة.

وعشان بردو نعرف قد إيه الموضوع دا بالنسبة لمصر الارقام بتقول إن مصر ومعاها الأرجنتين ومصر وأوكرانيا والإكوادور، كان مقرر تدفع 6 مليارات دولار على مدى 5 سنين مقابل الرسوم دي باعتبارهم أكبر المقترضين من صندوق النقد.
يعني باختصار الصندوق قرر يخفف الرسوم على مصر ودول تانية ودا أكيد هيخفف الضغط على سوق الصرف المحلي، وكمان مصر مستنية المراجعة الرابعة لصندوق النقد واللي كل شوية يأجلها عشان تصرف مليار و300 مليون دولار واللي أكيد هتساعد في دعم السيولة الدولارية

طيب ليه الصندوق خفف الرسوم؟
ببساطة الصندوق في الفترة الاخيرة اتعرض لهجوم شديد من أكبر المقترضين وخاصة مصر والارجنيتين بسبب سياساته القاسية في الاقراض والشروط اللي بيفرضها عشان يسلف الدول وكلنا فاكرين لما الرئيس السيسي انتقد سياسات الجهات المانحة وقال إنها بتغالي في شروطها وإن المفروض يكون الفيصل بس هو في قدرة الدولة على السداد ودي كانت رسالة قوية جدا للصندوق واللي قرر بعدها يدخل في مناقشات للتخفيف على الدول المقترضة.
كمان فيه سبب تاني مهم جدا لاصدار صندوق النقد للتسيرات الجديدة وهي ظهور منافس قوي لصندوق النقد وهو بنك التنمية الجديد التابع لبريكس واللي بيمول الدول بشروط ميسرة جدا وخاصة الدول الأعضاء وزي ما احنا عارفين مصر والارجنتين أعضاء في البريكس والصندوق لازم يخاف على مصالحه