سر الحمصاني.. ايه الإجراءات الاستثنائية اللي لمح ليها متحدث الحكومة
يظهر كده كل اللي جاي صعب ودا اللي لمحت ليه الحكومة في الكام ساعة اللي فاتت.. ايه اللي هيحصل وايه المقصود بالاجراءات الاستثنائية اللي الحكومة ناوية عليها.
المستشار محمد الحمصاني المتحدث الرسمي باسم مجلس الوزراء، طلع على المصريين وقال في مداخلة مع إحدى الفضائيات وهو بيرد على سؤال حول إمكانية تطبيق اقتصاد الحرب في حالة اتساع دائرة الحرب في المنطقةوقال أن الحكومة مأمنة كافة السلع والمنتجات اللي بيحتاجها الناس وعندها مخزون استراتيجي في حالة اتساع دائرة احداث المنطقة.
وفي كلامه قال الحمصاني إن فيه إجراءات استثنائية على المستوي الاقتصادي الدولة أو الحكومة هتنفذها لو حصل نقص في أي سلعة نتيجة مشاكل سلاسل الإمداد العالمية وأن مصر سبق ومرت بالموقف دا طول فترة انتشار فيروس كورونا..
طيب ايه هي الاجراءات الاستثنائية دي؟
عشان نبقي عارفين الحكومة بدأت تاخد احتياطها من اللي ممكن يحصل وعملت حساب كل حاجة وعشان كده كانت بتشتري السلع الأساسية والإستراتيجية بكميات كبيرة الفترة اللي فاتت سواء قمح أو زيوت أو سكر أو بترول وغاز ودا لان السلع دي زي ما قلنا كده استراتيجية يعني المواطن مايقدرش يستغنى عنها ولأنها بتتأثر باي أزمة في سلاسل الإمداد العالمي واللي ممكن يحصل فيها أزمة لو الصراع اتسع في المنطقة أو ارتفعت تكاليف النقل والشحن نتيجة زيادة المخاطر.
تاني حاجه الحكومة بتعملها لما يحصل أزمة عالمية زي اللي احنا فيها هي زيادة الإنتاج المحلي من السلع واللي بتشهد نقص في الكميات المستوردة من الخارج نتيجة اتساع دائرة الأزمة في المنطقة أو العالم وكمان الحكومة بتنشر الوعي بين الناس في حالة الأزمة بترشيد الاستهلاك ومحدش يشتري اكتر من احتياجاته عشان مايحصلش ارتفاع في أسعار السلع ودا بخلاف تكثيف الحملات التموينية على الأسواق ومحاربة الاحتكار ومواجهة اي محاولات لاستغلال الأزمة أو تخزين التجار للسلع.
طيب هل فيه خطر حقيقي على الأسواق أو يحصل نقص حاد في السلع؟
لغاية دلوقتي مفيش اي أزمات لأن الأمور طبيعية رغم ارتفاع الأسعار عالميا زي ما حصل في سوق البترول والأمور حسب التوقعات مش هتخرج عن السيطرة في الأسواق الدولية ومصر عندها حلول كتير ومنافذ تقدر وقت الحاجة توفر احتياجاتها منها وكمان موقع مصر الجغرافي مخليها في مركز تقاطع خطوط النقل الدولية.
