رعب في أسواق النفط العالمية.. وتوقعات بأزمة حادة في أسعار الطاقة
إيه اللي ممكن يحصل لو تم ضرب المنشآت النفطية في إيران؟ هل هيكون فيه تأثير على أسعار البترول في السوق العالمي؟ وإيه الدول اللي هتتأثر أكتر؟ وخصوصاً الدول اللي بتعتمد بشكل كبير على استيراد النفط من إيران؟ طيب.. إيه هو حجم إنتاج إيران من النفط؟ وإيه البدائل اللي ممكن تلجأ ليها الدول في حالة توقف الإمدادات الإيرانية؟ كل دي أسئلة بنسمعها كتير، خاصة مع التوترات اللي بتحصل في المنطقة، بس يا ترى.. الإجابات هتكون إيه؟ خلينا نبدأ ونفهم الصورة كاملة.
بلغة الأرقام فى سوق النفط فإيران واحدة من أكبر الدول المنتجة للنفط في العالم… الإنتاج اليومي من النفط في إيران بيوصل لحوالي 3.9 مليون برميل يومياً.. طبعاً ده بيحطها في مصاف الدول الكبيرة في سوق النفط.. ورغم إن العقوبات الاقتصادية المفروضة عليها أثرت بشكل كبير على قدرتها على التصدير إلا إنها لسه بتعتبر لاعب رئيسي في السوق العالمي، خاصةً لدول شرق آسيا زي الصين والهند.
طب مين أكبر الدول المستوردة للنفط من إيران؟
في مقدمة الدول اللى بتستورد النفطمن طهران الصين والهند… الصين بتعتبر أكبر مستورد للنفط الإيراني، وبتعتمد عليه في جزء كبير من احتياجاتها الطاقوية.. والهند برضه بتعتبر من أهم الشركاء التجاريين لإيران في مجال النفط وبتستورد كميات كبيرة لتغطية احتياجاتها المتزايدة مع تطور اقتصادها. ولو حصل أي تعطيل في الإمدادات الإيرانية، الدول دي هتكون أول المتضررين.
وإيه اللي ممكن يحصل لو تم ضرب المنشآت النفطية في إيران؟
لو حصل ضربات قوية لمنشآت التكرير أو الحقول النفطية، الإنتاج اليومي هيقل بشكل كبير.. وده هيؤدي لارتفاع فوري في أسعار النفط في السوق العالمي بسبب القلق من نقص الإمدادات.
لكن التأثير مش هيقف عند كده.. لأن مش بس الإنتاج الإيراني اللي هيتأثر، ده كمان هيكون فيه قلق من أي تصعيد في المنطقة ممكن يأثر على الدول المنتجة التانية في الخليج، زي السعودية والإمارات.. فبالتالي، أي ضربات هتحصل في إيران، هتكون ليها تداعيات أوسع على سوق النفط ككل.
وايه الخيارات المتاحة للدول المستوردة حال توقف امدادات ايران من النفط؟
في حالة توقف الإمدادات من إيران الدول المستوردة هتكون مضطرة تدور على بدائل من دول زي السعودية وروسيا ممكن تزود إنتاجها بشكل مؤقت لتعويض النقص لكن ده برضه هيكون ليه حدود.. لأن كل دولة عندها طاقة إنتاجية محددة ولو الطلب زاد بشكل كبير هيكون فيه صعوبة في تغطيته بالكامل.. ده غير إن التكلفة هتزيد وده هيكون له تأثير على الأسعار عالمياً.
الدول المستوردة الكبيرة زي الصين والهند ممكن تلجأ لمصادر تانية زي الولايات المتحدة أو دول غرب أفريقيا لكن برضه ده هيحتاج وقت وتكلفة أعلى في الشحن والنقل.
