كنز مش هيخلص.. شوف الدولة هتستغل مشروع رأس الحكمة إزاي

مشروع الاستثمار السياحي في رأس الحكمة واحد من اضخم المشروعات اللي مصر وقعت عقودها في القرن الحالي.. وهتكون له عوائد اقتصادية كبيرة علي الاقتصاد المصري.. يا تري عوائد المشروع ده هتوصل لكام.. واية الفايدة اللي هترجع علي مصر منه.. خليكم معانا للآخر وهتعرفوا التفاصيل 
 

مصر في الفترة الرئاسية الجديدة، بدأت تشتغل في نوع جديد من الاستثمار وهو الاستثمار السياحي والترفيهي والتسويقي وتوطين البراندات العالمية، وكانت البداية بمشروع الاستثمار السياحي في راس الحكمة وحاليا في 4 أو 5 مناطق وفقا للي أكده الدكتور مصطفي مدبولي رئيس مجلس الوزراء، هيكون مطروحين للدخول في شراكات مع القطاع الخاص كمشروعات استثمار سياحي، وده واحد من أهم مخططات الدولة للتنمية العمرانية لمصر 2052 واللى بتهدف لوضع مدينة رأس الحكمة على خريطة السياحة العالمية في الـ5 سنين اللي جايين علشان تكون واحدة من أرقى المقاصد السياحية على البحر المتوسط وفي العالم.

طيب العوائد المالية من مشروع راس الحكمة هتوصل لكام؟.
مشروع رأس الحكمة واحدة من اهم المشروعات الجاذبة للاستثمار السياحي بشكل كبير، وإجمالي المساحة المعروضة للاستثمار السياحي في مدينة رأس الحكمة بتوصل لـ 11.5 مليون متر، وبتستهدف جذب السائحين الوافدين لمصر لمنطقة رأس الحكمة .
الاستثمارات المبدئية للمشروع هتوصل لـ35 مليار دولار، وفي استثمارات متوقعة في السنين اللي جاية هتوصل لـ 150 مليار دولار، وده ضمن إستراتيجية الدولة لتوفير سيولة دولارية كبيرة هتزيد من صلابة الاقتصاد المصري في مواجهة الأزمات العالمية على الصعيد الجيوسياسي والاقتصادي وهتكون سبب اساسي في تخفيف أزمة النقد الأجنبي لتعويض غياب نسبة كبيرة من تدفقات النقد الأجنبي اللي اتاثرت بسبب الأزمات الدولية خصوصا التغيرات اللي حصلت في منطقة الشرق الاوسط واللي كان لها تاثير مباشر علي قطاعات السياحة وعائدات قناة السويس.
الاستثمارات اللي بتستهدفها الدولة من مشروع الاستثمار السياحي في رأس الحكمة بتستهدف كمان توفير عدد كبير جدا من فرص العمل، وده هيحصل من خلال الشركات المصرية اللي هتشتغل في مشروعات البنية التحتية في المدينة ده غير الشركات اللي هتدخل في مجالات الإنشاءات والمطورين العقاريين اللي هيتشغلوا في المنطقة غير الوظايف الكتيرة اللي هيوفرها المشروع بشكل مباشر وغير مباشر لما يشتغعل ويبدأ يستقبل السائحين والزوار من كل دول العالم .
مش كده بس لا ده كمان تاسيس مدينة سياحية في رأس الحكمة هيكون وراه تدشين أنشطة صناعية وتجارية وسكنية في كل المنطقة المحيطة بمدينة رأس الحكمة وده هيخلي المدينة واحدة من أهم مدن الجيل الجديد في الفترة الرئاسية الجديدة خصوصا أنها هتكون درة الاستثمارات في الفترة اللي جاية وهتكون هدف رئيسي لكل الاستثمارات اللي هتيجي مصر من الخارج خصوصا أن اي مستثمر هيكون عايز يأسس مشروعه في مكان العيون عليه وطبعا مفيش مستثمر هيلاقي مكان افضل من كده خصوصا أن اي مشروع في المنقطة دي هيكون علي زخم وإقبال من كل الناس.

بلغة الأرقام المشروع هيوفر 25 مليار دولار في السنة بشكل مبدئي بعد الانتهاء منه ودخوله مرحلة التشغيل .