لو متابع الأزمة.. شوف الجديد في ملف سيارات المعاقين الجديدة

ملف سيارات المعاقين وقف لحد فين، وهل الحكومة لسه مصرة على قرار عدم استيراد سيارات جديدة وكمان التفتيش على السيارات القديمة عشان تتأكد من استحقاق الناس ليها، ولا في تطور جديد في الموضوع وهنرجع تاني نستورد السيارات زي الأول بس بشروط جديدة.. هنقولك كل التفاصيل في الفيديو ده. 
 

طبعا ملف سيارات المعاقين بقى دلوقتي تريند كل يوم، وتصريحات من الحكومة بتقول هتصادر كل عربية اتباعت وهتطبق غرامات على البائع والمشتري، طب ايه موقف العربيات الموجودة في الجمارك دلوقتي؟

بص يا سيدي، الموقف القانوني لسيارات المعاقين المستوردة من الخارج والمحجوزة في الجمارك دلوقتي، فهي مسندة للجان فنية بتدرس إزاي تطبق عملية الإفراج عنها، وده حصل بعد قرار الوقف المؤقت لعمليات استيرادها لحين الانتهاء من فحص الأوراق اللي بتثبت صحة موقف مالك السيارة وهو المعاق، وإن مافيش حيل للتجارة في جوابات العربيات الصادرة عن المجالس الطبية.

عشان كده، نقدر نقول إن استيراد سيارات المعاقين هيتم توضيحه من خلال تشريعات جديدة هتحدد  ضوابط عشان مايتمش الاتجار في عملية جوابات السيارات، كمان موقف السيارة المحجوزة هتحدده لجان الفحص الحالية اللي بتقوم بدورها في فحص سيارات المعاقين خلال آخر 3 سنين.

يعني لجان فحص سيارات المعاقين من مصلحة الجمارك والجهات الحكومية الأخرى، هتعمل تسوية أوضاع ل 13 ألف حالة في الفترة منذ يونيو اللي فات لحد دلوقتي، وهم سددوا أكتر من 1.5 مليار جنيه، واللي هي رسوم الدولة كاملة، كمان هيتم اتخاذ عدد من الإجراءات للتأكد من استفادة المالك الحقيقي من ذوي الهمم، من السيارات اللب تم استيرادها خلال الفترة الماضية.

وكان رئيس مجلس الوزراء وافق على مهلة شهرين لاستقبال طلبات الناس لتسوية أوضاعهم وسداد مستحقات الدولة من حائزي سيارات المعاقين، عشان يتم بعدها إحالة أي مستفيد غير مستحق، ولم يتقدم لسداد مستحقات الدولة، إلى الجهات القضائية، بتهمة الاتجار بالبشر والتهرب الضريبي.

وماتنساش، إن في الفترة الأخيرة، مصلحة الجمارك أصدرت تعليمات جديدة بخصوص الإفراج الجمركي عن سيارات ذوي الهمم، وده كان بمنشور رسمي برقم 39 لسنة 2024.

والمنشور ده أكد ضرورة قيام أصحاب الشأن يعني صاحب الإعاقة، أو وكلائهم بإدراج البيانات الأساسية المطلوبة لاستخراج رقم التسجيل المسبق للشحنات (ACID)، وكمان البيانات الجمركية، وفقًا لرقم الإصدار الآلي المستحدث المخصص لسيارات ذوي الهمم، واللي تم تحديده تحت رقم «996 – 999 – 999».

كمان لازم يتم إدراج البيانات الأساسية المطلوبة لتسجيل البيان الجمركي بصورة صحيحة في الحقول المخصصة لها، زي "الاسم رباعي من واقع المستندات الرسمية المطلوبة، الرقم القومي، والعنوان"، وده للمستفيد من السيارة من ذوي الهمم، ومش أي رقم قومي تاني، سواء كان للوصي أو المستخلص.

ومن هنا، لازم يتم رفع المستندات الأصلية المطلوبة، زي "القومسيون الطبي– بطاقة الخدمات المتكاملة – بطاقة رقم قومي سارية، أو شهادة ميلاد كمبيوتر حديثة للقصر"، وده بصورة سليمة من غير تكرار مستندات غير مطلوبة، وبالإضافة لكده فلازم برضو يتم إدراج بيانات السيارة كاملة في الحقول المخصصة، زي نوع السيارة، موديل السيارة، رقم الشاسيه، السعة اللترية، وغيرها.

بعد كده، بيتم مراجعة كل البيانات المدرجة من خلال أصحاب الشأن أو وكلائهم من المخلصين الجمركيين المعتمدين، وكمان لازم التأكد من مطابقة البيانات الأساسية المطلوبة (الاسم – الرقم القومي – العنوان) للمستفيد من ذوي الهمم، وده من واقع المستندات المرفوعة والبيانات الأساسية المدرجة في كل الحقول الإجبارية مع تعديل ما يجب تعديله، بجانب التأكد من استيفاء كافة المستندات الأصلية المطلوبة للإفراج، وتسكينها في الحقول الخاصة بها.

وبكده، يقدر الشخص مستحق العربية يحصل على حقه فيها بشكل قانوني وبدون ما يكون عليه أي ملاحظات.