خطوات فتح حساب بالبنوك.. والأفضل بين الحساب الجاري وحساب التوفير
نفسك يكون عندك حساب في البنك، وتسحب وتحول فلوس وانت قاعد مكانك ولا محتاج تضرب مشوار للبنك، طيب تعرف اية الفرق بين الحساب الجاري حساب التوفير واية الافضل فيهم.. لو عايز تعرف كل ده شوف الفيديو ده للآخر
اسئلة كتيرة اكيد جت قدامك أو سمعتها او انت قولتها عن خطوات فتح حساب في البنوك واية هيا الاجراءات والشروط المطلوبة لفتح حساب جديد في البنك، وهل الحساب لازم يكون فيه رصيد ولو محتاج رصيد اقل وأكبر قيمة ممكن توصل لكام، وهل فتح الحساب لازم يكون لفرد كبير في السن ولا ممكن اي شخص يفتح حساب بشكل عادي، ولو فتحت حساب يا تري افتح حساب جاري ولا حساب توفير واية الاحسن فيهم.
قبل ما تدور كل الاسئلة دي في دماغك، البنوك دي اتاحت وبشكل كبير خطوات واجراءات كتيرة لتسهيل فتح الحاسبات للمواطنين مجانًا وبدون احتساب أي رسوم إدارية أو حد أدنى للرصيد، وكل اللي هتحتاجه هيا صورة بطاقة الرقم القومي بس، ومش هتحتاج أي مستند إثبات الدخل، وكمان المسئول في البنك هيطلب منك إيصال مياه أو كهرباء أو غاز طبيعي أو فاتورة تليفون لاثبات محل الإقامة .
الشروط اللي اعلنها البنك المركزي لفتح الحسابات الجديدة في البنوك تضمنت كمان تقديم توضيح لوظيفة العميل ده غير تقديم ما يثبت مفردات المرتب ولازم تكون من جهة العمل بالنسبة للموظفين، أما فيما يخص أصحاب المهن الحرة واللي معنهدمش إثبات دخل من جهة عمل أو جهة حكومية فيقدموا البطاقة الضريبية أو السجل التجاري.
أما بالنسبة لشروط فتح الحساب للناس اللي علي المعاش فالبنك اشترط تقديم ما يفيد خروجه على المعاش في بطاقته الشخصية.
طيب اية الافضل الحساب الجاري ولا حساب التوفير؟..
كل حساب من الحسابات اللي وفرتها البنوك لها شوية مميزات، وهيا أن الحساب الجاري بيمكن العميل من عمل التعاملات المتكررة والسريعة مع البنك سواء إيداع أو سحب للفلوس، أما حساب التوفير فهو حساب طويل الامد لحفظ الاموال في البنك علي سبيل الادخار.
الحساب الجاري يناسب أكثر الأشخاص اللي بيقوموا بعمليات سحب وإيداع بشكل متكرر زي الافراد العاديين والتجار والمستثمرين، لكن حساب التوفير يناسب الأشخاص اللي عايزين يستفيدوا من العوائد والفوايد الشهرية والمدخرين اللي عندهم خطط مستقبلي للاستمثار في الأموال والاحتفاظ بيها وتحقيق هامش ربح شهري منها.
وعلشان نكون عارفين أن الحساب الجاري العميل بياخذ دفتر شيكات للتعاملات المالية، لكن في حسابات التوفير بينزل للعميل فوايد دورية علي حساب في البنك وهي الارباح اللي بتحققها الفلوس بتاعته في البنك .
