سر التراجع المفاجئ في أسعار السيارات.. شوف المفاجأة

 

إيه سر التراجع المفاجئ في أسعار السيارات في السوق خلال الساعات الأخيرة وهل دا بداية الانفراجة ولا الموضوع فيه إن.. وايه مصير سيارات المعاقين والاستيراد وايه الطلب اللي بتلح عليه شعبة السيارات والتجار من الحكومة.. التفاصيل كلها هتلاقوها في الفيديو ده خليكم معانا للآخر.

 
زي ما احنا عارفين إن سوق السيارات زيرو ومستعمل فيه أزمة كبيرة في الفترة الأخيرة ودا بسبب الارتفاعات الكبيرة في الأسعار وعودة الأوفر برايس ودا لأسباب كتير أهمها وقف الاستيراد لحين انتهاء الحكومة من عمل معايير جديدة لاستيراد السيارات بخلاف أزمة سيارات ذوي الاحتياجات الخاصة ودا طبعا سبب أزمة كبيرة في تراجع المعروض مقابل طلب متزايد ومتراكم كمان وكان من الطبيعي أسعار السيارات تقفز بشكل كبير جدا ودا بقي خلق حالة من الركود في السوق ودا اللي أتوقعه بانكير لأن الارتفاع المبالغ فيه خلى الناس عندها أولويات تانية.

طيب ايه المفاجأة اللي حصلت في السوق أخيرا ؟
اللي متابع كويس لسوق السيارات هيعرف إنه في الساعات الأخيرة أسعار السيارات نزلت بنسبة تتراوح بين 2و 5% والحقيقة الانخفاض دا كان مفاجأة السوق لأن أسباب الارتفاع لسه موجوده ومفيش حاجة جدت من ناحية الاستيراد أو زيادة العرض.. طيب ايه السر... شوف خبراء السوق فسروا التراجع في الأسعار لعدة أسباب منها حصول عزوف من الناس على الشراء نتيجة الارتفاع الغير منطقي في الأسعار وخاصة مع بدء موسم الدراسة وانشغال الأسر المصرية بمصاريف المدارس واللي بتضغط ميزانية المواطنين وبالتالي تراجعت أولوية شراء سيارة  ومن ناحية تانية قال منتصر زيتون، عضو الشعبة العامة للسيارات بالاتحاد العام للغرف التجارية، إن انخفاض العرض والطلب خلال آخر 3 شهور من السنة تسبب في تراجع أسعار الأوفر برايس مش في السعر الرسمي.

زيتون قال كمان إن  الأوفر برايس موجود في كل دول العالم وهو مرتبط بالعرض والطلب في سوق السيارات، وعشان نخل أزمة السيارات المسؤول طالب نيابة عن كل التجار الحكومة بفتح باب استيراد السيارات للمواطنين فورا أو الاستيراد الشخصي لضبط سوق السيارات وضبط الأسعار وفتح باب المنافسة بين الموزعين.

وبخصوص أزمة سيارات المعاقين قال عضو الشعبة العامة للسيارات بالاتحاد العام للغرف التجارية بالقاهرة إن الأزمة لسه مستمرة وكل اللي تم الإفراج عنه يدوب بنسبة أقل من 5% وإن دا سبب من اسباب ارتفاع أسعار السيارات في الفترة الأخيرة ولغاية دلوقتي لسه الحكومة بتراجع موقف ملفات سيارات المعاقين